महावितरण व राज्यशासनाने ग्राहकांची सक्तीची वीजबिल वसुली थांबवावी – आ.प्रा. देवयानी फरांदे
नाशिक – महावितरणने वीजबिल न भरल्यास ७५ लाख वीज ग्राहकांना कनेक्शन तोडण्याची नोटीस पाठवली असून हे महाराष्ट्रातील ४ कोटी जनतेला अंधारात टाकण्याचे पाप आहे. कोरोना काळात अवाजवी वीज बिल आल्यावर ती बिलं भरण्याची क्षमता सामान्य माणसाकडे नाही. विविध कारणांनी संकटात आलेला शेतकरीही वीज बिल भरण्याच्या अवस्थेत नाही. अवाजवी बिलं दुरुस्त करण्याची घोषणाही प्रत्यक्षात आली नाही. कोरोना प्रसारापूर्वी महाविकासआघाडीच्या ऊर्जामंत्र्यांनीच १०० युनिट पर्यंतचे वीज बिलं माफ करण्याचे आश्वासन दिले होते. परंतु हे आश्वासनही प्रत्यक्षात आले नाही. जर दिलेली आश्वासने पूर्ण करायची हिम्मत महाविकासआघाडी सरकार मध्ये नसेल तर निदान अशी सक्तीने वीज बिलं वसूली करणे थांबवावे नाही तर भारतीय जनता पार्टी रस्त्यावर उतरून पुन्हा जन आंदोलन करेल अशा इशारा भारतीय जनता पार्टीच्या प्रदेश सरचिटणीस तथा आमदार देवयांनी फरांदे यांनी महाविकास आघाडी सरकारला दिला आहे.
भाजप सरकारच्या काळात कधीच शेतकऱ्यांना वीज बिल भरण्याची सक्ती केली नाही. यामुळे थकबाकी वाढली तरी तो भार राज्य सरकारने स्वत:वर घेतला. भाजपचे सरकार असतांना कृषी क्षेत्रासाठी साडेसात लाख नवीन वीज जोडण्या दिल्या. पण वीज कंपन्यांही फायद्यात राहील्या होत्या. जर भाजप सरकारला हे शक्य होते तर आताच्या महाविकास आघाडी सरकारला कठिण आहे का? असा सवालही आ. प्रा. देवयानी फरांदे यांनी सरकारला विचारला आहे.
अगोदरच आर्थिक संकटात सापडलेल्या शेतकरी बांधवांना आणि सर्वसामान्य जनतेला महाविकासआघाडी सरकारने अडचणीत टाकू नये. कोरोना काळात जनतेला वीज बिल माफीचे आश्वासन देणारे सरकार आता सक्तीने वीज बिल वसूली करून जनतेला नाहक त्रास देत आहे. थकीत बिल भरले नाही तर वीज पुरवठा खंडीत करण्याचा निर्णय घेणारे हे सरकार किती असंवेदनशील आहे हे यावरून दिसून येते. मात्र भारतीय जनता पार्टी या महाविकासआघाडी सरकारला मनमानी कारभार करू देणार नाही. देशाचे पंतप्रधान नरेंद्र मोदी यांनी जनतेला दिलासा देण्यासाठी जनताभिमुख अर्थसंकल्प जाहीर केलेला असून त्याचेच अनुकरण राज्यसरकारने करून राज्यातील जनतेला दिलासा द्यावा असेही आ.फरांदे यांनी यावेळी सांगितले.
यावेळी भाजप ज्येष्ठ नेते लक्ष्मण सावजी, भाजप महिला आघाडीच्या अध्यक्षा सौ. हिमगौरी आडके, मध्य पश्चिम मंडल अध्यक्ष देवदत्त जोशी, नगरसेवक प्रशांत जाधव, मा. नगरसेवक हरिभाऊ लोणारी, नगरसेविका स्वाती भामरे, गणेश कांबळे, अमित घुगे, पवन भगुरकर, देवा जाधव, यांच्यासह आदी भाजप पदाधिकारी व कार्यकर्ते उपस्थित होते.
