लष्करी हद्दीतून चंदनाची चोरी, उपनगर पोलीस ठाण्यात गुन्हा दाखल
नाशिक : लष्करी हद्दीत शिरून तस्करांनी चंदनाचे झाड कापून नेल्याची घटना नुकतीच उघडकीस आली. या घटनेने लष्करी छावणीच्या सुरक्षेचा प्रश्न ऐरणीवर आला असून, याप्रकरणी उपनगर पोलीस ठाण्यात चोरीची गुन्हा दाखल करण्यात आला आहे. सुबेदार देशराज (रा.आर्टीलरी डेपो रेझीमेंट ना.रोड) यांनी याप्रकरणी तक्रार दाखल केली आहे. सुबेदार देशराज आर्मी आर्टीलरी सेंटर येथे नेमणुकीस असून, मंगळवारी (दि.१५) रात्री अज्ञात चोरट्यांनी आर्टीलरी सेंटर मध्ये शिरून ही चोरी केली. लष्करी हद्दीत शिरलेल्या चोरट्यांनी अशोक चक्र गेट ४९ पिलर मध्ये असलेल्या बिल्डींग नं.१६५ परिसरतील १५ ते २० फुट उंचीचे खोड कापून नेले. अधिक तपास पोलीस नाईक शेख करीत आहेत.
…..
आऊट हाऊसमधून मोबाईल चोरी
नाशिक : सोसायटीच्या आऊट हाऊसमध्ये चार्जिंगला लावलेला मोबाईल चोरट्यांनी चोरून नेल्याची घटना सावरकरनगर भागात घडली.याप्रकरणी गंगापूर पोलीस ठाण्यात चोरीचा गुन्हा दाखल करण्यात आला आहे.
कृष्णा चित्र सिंह (रा.तेजोवलय अपा.सावरकरनगर) यांनी याप्रकरणी तक्रार दाखल केली आहे. कृष्णा सिंह गेल्या मंगळवारी (दि.८) मुलगा अंकुश यास इमारतीच्या आवरात सायकल शिकवीत असतांना ही घटना घडली. अपार्टमेंटच्या आऊट हाऊसचे दार उघडे ठेवून त्यांनी आपला मोबाईल चार्जिंगला लावला असता अज्ञात चोरट्यांनी दरवाजा उघडा असल्याची संधी साधत मोबाईल चोरून नेला. अधिक तपास पोलीस नाईक मोहिते करीत आहेत.
……
मुलीवर बलात्कार एकास अटक
नाशिक : घरात शिरून एकाने लग्नाचे आमिष दाखवून तसेच जीवे ठार मारण्याची धमकी देत अल्पवयीन मुलीवर वेळोवेळी बलात्कार केल्याची घटना नुकतीच उघडकीस आली. याप्रकरणी आडगाव पोलीस ठाण्यात बलात्कार आणि पोस्को कायद्यान्वये गुन्हा दाखल करण्यात आला असून पोलीसांनी संशयीतास बेड्या ठोकल्या आहेत.
शंकर रामदास माळी (२६ रा.बेलतगव्हाण,नाशिकरोड) असे संशयीताचे नाव आहे. माडसांगवी ता.जि.नाशिक येथील १६ वर्षीय पिडीत मुलीच्या आईने याप्रकरणी तक्रार दाखल केली आहे. मुलगी घरात एकटी असल्याची संधी साधत संशयीताने हे कृत्य केले. १४ आॅक्टोबर ते १५ डिसेंबर या दरम्यान वेळोवेळी घरात शिरून संशयीताने मुलीस लग्नाचे आमिष दाखविले तसेच याबाबत वाच्यता केल्यास जीवे मारण्याची धमकी देत बळजबरीने बलात्कार केला. याबाबत मुलीने आपल्या कुटूंबियांकडे आपबिती कथन केल्याने हा प्रकार पोलीसात पोहचला असून अधिक तपास उपनिरीक्षक चांदणी पाटील करीत आहेत.
…..
सराईताकडून तीघांना मारहाण
नाशिक : सोसायटीचे प्रवेशद्वार लवकर उघडले नाही या कारणातून सराईत गुन्हेगाराने सुरक्षारक्षकासह बापलेकीस मारहाण केल्याची घटना वडाळा पाथर्डी रोडवर घडली. याप्रक्रणी इंदिरानगर पोलीस ठाण्यात गुन्हा दाखल करण्यात आला आहे. हरिप्रसाद गौरीलाल जोशी उर्फ राज जोशी (२१ रा.चित्रकुट सोसा.इंदिरानगर) असे संशयीताचे नाव आहे. याप्रकरणी शिवाजी कोळेकर (रा.चित्रकुट राघव,वडाळा पाथर्डी रोड) यांनी तक्रार दाखल केली आहे. बुधवारी (दि.१६) ही घटना घडली. सोसायटीचे प्रवेशद्वार लवकर उघडले नाही या कारणातून संशयीत सुरक्षारक्षक ढवळे यास मारहाण करीत होता. याचवेळी कोळेकर बापलेक तेथे गेले असता संशयीतांनी त्यांनाही मारहाण केली. या घटनेत संशयीताने कोळेकर यांच्या हातास चावा घेतला असून अधिक तपास जमादार पाळदे करीत आहेत. दरम्यान संशयीत पोलीस रेकॉर्डवरील गुन्हेगार असून त्याच्याविरोधात इंदिरानगर व भद्रकाली पोलीस ठाण्यात गंभीर गुन्हे दाखल आहेत.
…..
दुचाकी घसरल्याने एक ठार
नाशिक : भरधाव दुचाकी घसरल्याने ४७ वर्षीय इसमाचा मृत्यु झाला. हा अपघात शेवगे दारणा ता.जि.नाशिक येथे झाला. याप्रकरणी नाशिकरोड पोलीस ठाण्यात मृत्युची नोंद करण्यात आली आहे. समाधान धर्माजी पाळदे (४७ रा.शेवगे दारणा ता.जि.नाशिक) असे मृत दुचाकीस्वाराचे नाव आहे. पाळदे बुधवारी (दि.१६) पळसे येथे गेले होते. सायंकाळच्या सुमारास ते आपल्या दुचाकीने घराकडे जात असतांना ही घटना घडली. कारखाना रोडने प्रवास करीत असतांना शेवगे दारणा येथील साई मंदिराजवळ त्यांना फिट आल्याने दुचाकी घसरली. या घटनेत त्यांच्या डोक्यास मोठी दुखापत झाल्याने कुटूंबियांनी त्यांना तात्काळ धामणगाव येथील एसएमबीटी रूग्णालयात प्रथमोपचार करून अधिक उपचारार्थ जिल्हारूग्णालयात दाखल केले असता उपचार सुरू असतांना त्याचा मृत्यु झाला. अधिक तपास हवालदार गांगुर्डे करीत आहेत.
…
