नाशिक – रस्ता ओलांडत असतांना महिलेच्या गळयातील पोत दुचाकीस्वाराने ओरबडली

नाशिक : रस्ता ओलांडत असतांना महिलेच्या गळयातील पोत दुचाकीस्वार भामट्याने ओरबाडून नेल्याची घटना औरंगाबाद रोडवर घडली. सदर महिला विवाह सोहळयासाठी लॉन्सच्या दिशेने पायी जात असतांना ही घटना घडली. याप्रकरणी आडगाव पोलीस ठाण्यात जबरीचोरीचा गुन्हा दाखल करण्यात आला आहे.
सुवर्णा मनोहर भागवत (रा.आयोध्यानगरी,आव्हाड मळा,चेतनानगर) यांनी याप्रकरणी तक्रार दाखल केली आहे. भागवत या मंगळवारी (दि.५) नातेवाईकांच्या विवाह सोहळय़ा निमित्त चव्हाण नगर भागात गेल्या होत्या. औरंगाबाद रोडवरील लॉन्स समोर त्या रस्ता ओलांडत असतांना ही घटना घडली. तपोवनरोडवरील डेकोर प्लायवूड या दुकान भागात समोरून आलेल्या दुचाकीस्वाराने त्यांच्या गळय़ातील सुमारे ९५ हजार रूपये किमतीची सोन्याची पोत खेचून नेली. अधिक तपास उपनिरीक्षक चांदणी पाटील करीत आहेत.

……..
बोलेरोसह दुचाकी चोरी
नाशिक : शहरात वाहनचोरीची मालिका सुरू असून वेगवेगळया भागात पार्क केलेल्या बोलेरो जीपसह दुचाकी चोरट्यांनी चोरून नेली. याप्रकरणी उपनगर आणि म्हसरूळ पोलीस ठाण्यात गुन्हे दाखल करण्यात आले आहेत.
नाशिक रोड भागात राहणा-या कल्याणी संतोष रोहताल (रा.जीवनछाया रो हाऊस,जयभवानी रोड) यांनी दिलेल्या तक्रारीत म्हटले आहे की, रोहताल यांच्या मालकीची सुमारे दीड लाख रूपये किमतीची बोलेरो जीप (एमएच १५ सीके ७५८६ ) २९ डिसेंबर रोजी त्यांच्या घरासमोर पार्क केलेली असतांना चोरट्यांनी चोरून नेली. याप्रकरणी उपनगर पोलीस ठाण्यात गुन्हा दाखल करण्यात आला असून अधिक तपास हवालदार शेजवळ करीत आहेत. तर मानेनगर भागात राहणारे भवरलाल सुकाराम चौधरी (रा.जय गजानन अपा.रासबिहारी लिंकरोड) यांची स्प्लेंडर (एमएच १५ जीयू ७३७५) २५ डिसेंबर रोजी त्यांच्या सोसायटीच्या पार्किंगमध्ये लावलेली असतांना चोरट्यांनी पळवून नेली. याप्रकरणी म्हसरूळ पोलीस ठाण्यात गुन्हा दाखल करण्यात आला असून अधिक तपास जमादार निकम करीत आहेत.

……….
जेलरोडला महिलेची आत्महत्या
नाशिक : जेलरोड भागातील त्रिमुर्तीनगर परिसरात राहणा-या ४२ वर्षीय महिलेने आपल्या राहत्या घरात गळफास लावून घेत आत्महत्या केली. सदर महिलेच्या आत्महत्येचे कारण स्पष्ट होवू शकले नाही. याप्रकरणी नाशिकरोड पोलीस ठाण्यात मृत्युची नोंद करण्यात आली आहे. कल्पना सोमनाथ घोडे (रा.इच्छामणी बंगला,राजराजेश्वरी जवळ) असे मृत महिलेचे नाव आहे. कल्पना घोडे यांनी सोमवारी (दि.४) रात्री अज्ञात कारणातून आपल्या राहत्या घरातील हॉलमध्ये लोखंडी हुकाला ओढणी बांधून गळफास लावून घेतला होता. त्यात त्यांचा मृत्यु झाला. याप्रकरणी सोगेश शिंदे यांनी दिलेल्या खबरीवरून पोलीस दप्तरी नोंद करण्यात आली असून अधिक तपास हवालदार कोकाटे करीत आहेत.
…………