नाशिक – मैत्रीणीचा वाद सोडविण्यासाठी गेलेल्या मामी भाचीचा विनयभंग, दोघांना अटक

मामी भाचीचा विनयभंग दोघांना अटक
नाशिक : मैत्रीणीचा वाद सोडविण्यासाठी गेलेल्या मामी भाचीचा विनयभंग करण्यात आल्याची घटना औद्योगीक वसाहतीतील अशोकनगर भागात घडली. याप्रकरणी सातपूर पोलीस ठाण्यात चार जणांविरूध्द विनयभंग आणि बाललैंगिक अत्याचार प्रतिबंधक संरक्षण (पोस्को) कायद्यान्वये गुन्हा दाखल करण्यात आला असून,दोघांना अटक करण्यात आली आहे.

दीपक हिरामण घोडेस्वार (४५) व प्रदिप चंद्रकांत सोनवणे (३१ रा.समाधान स्विट जवळ,अशोकनगर भाजी मार्केट) अशी अटक करण्यात आलेल्या संशयीतांची नावे आहेत. या गुह्यात अटक केलेल्या संशयीतांसह शालिनी दीपक घोडेस्वार व एका अल्पवयीन मुलावरही गुन्हा दाखल करण्यात आला आहे. पीडित महिलेने दिलेल्या तक्रारीनुसार २९ मार्च रोजी पीडितेच्या मैत्रीणीचा आणि संशयीत शालिनी घोडेस्वार यांचा कुणाल मेडिकल दुकानासमोर आर्थिक देवाण घेवाणीतून वाद सुरू होता. यावेळी सदर महिला आणि तीची अल्पवयीन भाची वाद मिटविण्यासाठी गेली असता संशयीत महिलेने पीडितेचे केस पकडले तर तिच्या पतीने लाथाबुक्यांनी मारहाण केली. यावेळी अल्पवयीन मुलाने व प्रदिप सोनवणे याने पीडितेच्या भाचीचा विनयभंग केला. तसेच तिला खाली पाडून शिवीगाळ व मारहाण केल्याचे म्हटले आहे. अधिक तपास उपनिरीक्षक काळे करीत आहेत.

……

बापलेकावर वस्ता-याने हल्ला
नाशिक : शिवीगाळ केल्याचा जाब विचारल्याने संतप्त एकाने बाप लेकास लाथाबुक्यांनी बेदम मारहाण करीत त्यांच्यावर धारदार वस्ता-याने हल्ला केल्याची घटना शिवाजीनगर भागातील ड्रीम सिटी परिसरात घडली. या घटनेत बापलेक जखमी झाले असून याप्रकरणी उपनगर पोलीस ठाण्यात गुन्हा दाखल करण्यात आला आहे.
अजय प्रभाकर निखाडे (रा.तोरणा सोसा.ड्रीम सिटी समोर शिवाजीनगर) असे बापलेकावर हल्ला करणा-या संशयीताचे नाव आहे. याप्रकरणी रामराव लहानू गडकरी (६९ रा.श्रमसाफल्य बंगला,तोरणा सोसा.) यांनी तक्रार दाखल केली आहे. गडकरी सोमवारी (दि.५) रात्री आपल्या घरात असतांना संशयीत कुठलेही कारण नसतांना शिवीगाळ करीत आला. यावेळी गडकरी यांनी त्यास जाब विचारला असता संशयीताने त्यांना घरात घुसून लाथाबुक्यांनी मारहाण केली. यावेळी त्याने खिशातील धारदार वस्तारा काढून त्यांच्या तोंडावर वार केला. याप्रसंगी गडकरी यांचा मुलगा त्यांच्या मदतीस धावून आला असता संशयीताने त्याच्यावरही वस्ता-याने वार करीत लाथाबुक्यांनी मारहाण केली. या घटनेत दोघे बापलेक जखमी झाले असून अधिक तपास हवालदार मुसळे करीत आहेत.