मुलीची छेड काढली, चार जणांनी १७ वर्षीय मुलास केली बेदम मारहाण
नाशिक : मुलीची छेड काढली या कारणातून चार जणांच्या टोळक्याने १७ वर्षीय मुलास बेदम मारहाण केल्याची घटना शिवाजीनगर भागात घडली. या घटनेत हॉकीस्टीकचा वापर करण्यात आल्याने मुलगा जखमी झाला असून याप्रकरणी गंगापूर पोलीस ठाण्यात गुन्हा दाखल करण्यात आला आहे.
प्रमोद जाधव व त्याचे तीन साथीदार अशी संशयीतांची नावे आहेत. याप्रकरणी शुभम प्रमोद गडदे (१७) या मुलाने तक्रार दाखल केली आहे. गडदे सोमवारी (दि.८) दुपारच्या सुमारास शिवाजीनगर परिसरातील भवर टावर येथील न्यु महेंद्र स्विटजवळ उभा असतांना ही घटना घडली. शुभम गडदे व त्याचा मित्र उभा असतांना तीन मुली तेथून जात होत्या. यावेळी एका मुलीने त्यास काय बघतो असे म्हटले असता त्याने प्रत्युत्तर केले. त्यामुळे संतप्त टोळक्याने त्यास मुलींची छेड काढतो काय असे म्हणत बेदम मारहाण केली. यावेळी एकाने हॉकीस्टीक डोक्यात मारल्याने शुभम गडदे जखमी झाला असून अधिक तपास पोलीस नाईक चौधरी करीत आहेत.
…..
घटस्फोटीत महिलेचा पाठलाग करून मारहाण करुन विनयभंग
नाशिक : घटस्फोटीत महिलेचा पाठलाग करून एकाने मारहाण करीत विनयभंग केल्याची घटना नुकतीच उघडकीस आली. महिलेने विवाहास नकार दिल्याने हा प्रकार झाला असून याप्रकरणी मुंबईनाका पोलीस ठाण्यात गुन्हा दाखल करण्यात आला आहे.
सुमित पोपट बागुल (२९ रा.अमोल पार्क,हनुमानवाडी) असे महिलेचा विनयभंग करणा-या संशयीताचे नाव आहे. याप्रकरणी २४ वर्षीय घटस्फोटीत महिलेने तक्रार दाखल केली आहे. संशयीत व तक्रारदार महिला एकमेकांचे परिचीत आहेत. महिलेचा घटस्फोट झाल्याने संशयीत गेल्या वर्षभरापासून तिचा पाठलाग करून लग्नाची मागणी घालत आहेत. जून २०२० ते मार्च २०२१ या काळात महिला पुणा मार्गाने आपल्या कामावर जात असतांना संशयीत पाठलाग करीत महिलेचे फोटो व्हायरल करण्याची धमकी देत आहे. महिलेने वेळोवेळी लग्नास नकार दिल्याने संशयीताने तिला मारहाण करीत विनयभंग केल्याचे तक्रारीत म्हटले आहे. अधिक तपास उपनिरीक्षक पाटील करीत आहेत.
……..
शहरतील वेगवेगळया भागात राहणा-या तीघांनी केली आत्महत्या
नाशिक : शहरतील वेगवेगळया भागात राहणा-या तीघांनी मंगळवारी (दि.९) गळफास लावून घेत आत्महत्या केली. त्यात दोन महिलांसह अनोळखी तरूणाचा समावेश आहे. तिघांच्याही आत्महत्येचे कारण अद्याप स्पष्ट होवू शकले नाही. याप्रकरणी पंचवटी आणि आडगाव पोलीस ठाण्यात वेगवेगळया मृत्युच्या नोंदी करण्यात आल्या आहेत.
हिरावाडीतील त्रिमुर्तीनगर भागात राहणा-या माधवी विनोद नरवडे (२४ रा.माऊली किराणा दुकानाजवळ) या विवाहीतेने मंगळवारी आपल्या राहत्या घराच्या पहिल्या मजल्यावरील बेडरूममध्ये अज्ञात कारणातून पंख्यास साडी बांधून गळफास लावून घेतला होता. त्यात तिचा मृत्यु झाला. याबाबत अमोल पेठाले यांनी दिलेल्या खबरीवरून पंचवटी पोलीस ठाण्यात मृत्युची नोंद करण्यात आली असून अधिक तपास पोलीस नाईक खाजेकर करीत आहेत. दुसरी घटना विंचूर गवळी येथे घडली. प्रिया रवी लोहकरे (२७ रा.विंचुरगवळी,माडसांगवी) यांनी मंगळवारी अज्ञात कारणातून आपल्या राहत्या घरात गळफास लावून घेतला होता. ही बाब लक्षात येताच कुटूंबियांनी त्यांना तात्काळ आडगाव मेडिकल कॉलेज येथे दाखल केले असता वैद्यकीय सुत्रांनी मृत घोषीत केले. तर आडगाव शिवारातील महाराजा हॉटेलच्या बाजूला असलेल्या मोकळया प्लॉटमधील निंबाच्या झाडास २५ वर्षीय युवक गळफास लावलेल्या अवस्थेत आढळून आला. मंगळवारी सकाळच्या सुमारास उघडकीस आलेल्या या घटनेत सदर युवकाने बॉक्स बांधण्याची पांढरी पट्टी झाडास बांधून गळफास लावून घेत आत्महत्या केली. दिलीप दादाराव नरवडे यांनी याबाबत खबर दिली असून, दोन्ही घटनांप्रकरणी आडगाव पोलीस ठाण्यात मृत्युच्या नोंदी करण्यात आल्या आहेत. अधिक तपास अनुक्रमे हवालदार लोहकरे आणि कहांडळ करीत आहेत.
