महिलेची पोत खेचली
नाशिक : सोसायटीचे प्रवेशद्वार उघडून कारच्या दिशेने जाणा-या महिलेच्या हातातील मोबाईलसह मंगळसुत्र दुचाकीस्वार भामट्यांनी ओरबडून नेल्याची घटना कॉलेजरोड वरील शिर्के मळा भागात घडली. याप्रकरणी गंगापूर पोलीस ठाण्यात जबरीचोरीचा गुन्हा दाखल करण्यात आला आहे. ज्योत्सना गोविंद जंगले (रा.प्रभू प्रसाद अपा.शिर्केमळा) यांनी याप्रकरणी तक्रार दाखल केली आहे. जंगले या कार पार्क करण्यासाठी आपल्या सोसायटीचे प्रवेशद्वार उघडण्यासाठी गेल्या असता ही घटना घडली. प्रवेशद्वार उघडून त्या नजीकच उभ्या असलेल्या कारच्या दिशेने मोबाईलवर बोलत जात असतांना समोरून दुचाकीवर आलेल्या भामट्यांनी त्यांच्या गळयातील मंगळसुत्रासह हातातील मोबाईल असा सुमारे ९० हजाराचा ऐवज हिसकावून नेला. अधिक तपास हवालदार दळवी करीत आहेत.
…..
कारसह दोन मोटारसायकली चोरी
नाशिक : शहरात वाहनचोरीचे सत्र सुरूच असून सोसायटीच्या पार्किंगमध्ये लावलेल्या कारसह चोरट्यांनी दोन मोटारसायकली चोरून नेल्या. याप्रकरणी भद्रकाली,सरकारवाडा आणि म्हसरूळ पोलीस ठाण्यात गुन्हे दाखल करण्यात आले आहेत. टाकळीरोड येथील प्रविण विठ्ठल खलाणे (रा.शितल हौसिंग सोसा.शंकरनगर) यांची इको कार (एमएच १५ सीटी ४१९५) दि.५ ते १२ जानेवारी दरम्यान त्यांच्या सोसायटीच्या पार्किंगमध्ये लावलेली असतांना चोरट्यांनी चोरून नेली. याप्रकरणी भद्रकाली पोलीस ठाण्यात गुन्हा दाखल करण्यात आला असून अधिक तपास हवालदार दळवी करीत आहेत. दुसरी घटना कुलकर्णी गार्डन भागात घडली. याप्रकरणी नितीन रघुनाथ धोंडगे (रा.बिजोरसे ता.बागलाण) यांनी तक्रार दाखल केली आहे. धोंडगे २८ डिसेंबर रोजी नातेवाईकांकडे शहरात आले होते. शरणपूर वाईन शॉप नजीकच्या निलगंगा अपार्टमेंटच्या पार्किंगमध्ये लावलेली त्यांची स्प्लेंडर चोरट्यांनी चोरून नेली. याप्रकरणी सरकारवाडा पोलीस ठाण्यात गुन्हा दाखल करण्यात आला असून अधिक तपास हवालदार गावीत करीत आहेत. तर दिंडोरीरोड भागातील राहूल बबन आव्हाड (रा.सिल्व्हर स्टार सोसा.समृध्दी कॉलनी आकाश पंपामागे) यांची मोटारसायकल एमएच १५ बीपी ८१८८ गेल्या बुधवारी (दि.६) त्यांच्या सोसायटीच्या पार्किंगमध्ये लावलेली असतांना चोरट्यांनी पळवून नेली. याप्रकरणी म्हसरूळ पोलीस ठाण्यात गुन्हा दाखल करण्यात आला असून अधिक तपास पोलीस नाईक वसावे करीत आहेत.
