नाशिक : मध्यस्थी केल्याचा राग आल्याने सहा जणांनी एकास मारहाण करत चॉपरने वार केले व गळ्यातील सोन्याचे चेन हिसकावून नेली. याप्रकरणी ऋषिकेश वसंत बोडके (रा. मखमलाबादरोड, पंचवटी) याने दिलेल्या फिर्यादीवरून संशयित गौरव देशमुख (पुर्ण नाव व पत्ता माहिती नाही) व त्याच्या पाच साथीदारांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी ऋषिकेशचा मित्र सागर शेळके यांच्याकडे होम क्रेडीचे हप्ते बाकी होते. ते मागण्यासाठी संशयित गौरव देशमुख त्यांच्याकडे गेला असता त्यांच्यात शिवीगाळ झाली. त्यामुळे फिर्यादी ऋषिकेशने मध्यस्थी करत समजावण्याचा प्रयत्न केला. त्याचा राग आल्याने संशयित गौरव हा त्यांच्या पाच जोडीदारांसह ऋषिकेश राहत असलेल्या इमारतीच्या पार्किंगमध्ये गेला व त्यास शिवीगाळ केली. यावेळी एका संशयिताने धारदार चॉपरने ऋषिकेशच्या डोक्यावर वार केले. तसेच बाजूला पडलेल्या फर्शीचे तुकडे व विटांनी मारहाण केली. तसेच गळ्यातील सोन्याची चेन हिसकावून नेली. याप्रकरणी सहायक पोलीस निरीक्षक व्ही. व्ही. गीरी तपास करत आहे.
———-
भांडण सोडवणे पडले महागात
नाशिक : भांडण सोडवण्याचा प्रयत्न करणा-या एकास लाकडी दांडक्याने मारहाण करत जखमी केले. याप्रकरणी उत्तम लिंबा आव्हाड (रा. निलगीरीबाग) यांनी दिलेल्या फिर्यादीवरून संशयित करण शिंदे (पुर्ण नाव माहित नाही) याच्याविरुद्ध आडगाव पोलीस ठाण्यात गुन्हा दाखल केला आहे.
सोमवारी (दि. १) सायंकाळी चारच्या सुमारास संशयित करण शिंदे व अन्य एकाचे निलगीरी बाग परिसरात भांडण सुरू होते. त्यामुळे फिर्यादी उत्तम आव्हाड यांनी भांडण सोडवण्याचा प्रयत्न केला असता संशयित करण शिंदे यास त्याचा राग आला व आमचे आम्ही बघून घेवू असे म्हणत त्याने फिर्यादीस लाकडी दांडक्याने मारहाण करून जखमी केले. याप्रकरणी हवालदार थेटे तपास करत आहे.
———
