नाशिक : मद्यप्राशन करण्यास पैसे दिले नाही या कारणातून एका हमालास सराईत गुन्हेगाराने लुटल्याची घटना लक्ष्मीनगर भागात घडली. या घटनेत कोयत्याने वार करण्यात आल्याने हमाल जखमी झाला असून, पोलीसांनी संशयीतास बेड्या ठोकल्या आहेत. याप्रकरणी पंचवटी पोलीस ठाण्यात लुटमारीचा गुन्हा दाखल करण्यात आला आहे.
संदेश सुधाकर पगारे (रा.पेठरोड,पंचवटी) असे अटक करण्यात आलेल्या संशयीताचे नाव असून तो पोलीस रेकॉर्डवरील गुन्हेगार आहे. याप्रकरणी अंकुश अरूण गायकवाड (रा.कालीकानगर,फुलेनगर) या युवकाने तक्रार दाखल केली आहे. गायकवाड दिंडोरीरोडवरील मार्केट यार्डात हमाली काम करतो. शनिवारी (दि.१३) हमाली काम करून गायकवाड आपल्या घराकडे पायी जात असतांना ही घटना घडली. लक्ष्मीनगर भागात त्यास संशयीत गुन्हेगाराने दारू पाज नाही तर पैसे दे असे म्हणून त्याची वाट अडविली. यावेळी गायकवाड याने दारू पाजण्यास नकार देत आपल्याकडे पैसे नसल्याचे सांगितल्याने संतप्त पगारे याने कमरेस लावलेला कोयता काढून त्याच्या गालावर वार केला. या घटने गायकवाड जखमी झाल्याचे लक्षात येताच संशयीताने त्याच्या पॅण्टच्या खिशातील पंधराशे रूपयांची रोकड बळजबरी काढून पोबारा केला होता. गायकवाड याने पोलीस ठाणे गाठून आपबिती कथन केल्याने अल्पावधीतच पोलीसांनी संशयीतास जेरबंद केले असून अधिक तपास सहाय्यक निरीक्षक शिंदे करीत आहेत.
