मंदिरातील दानपेटी फोडून रोकड लंपास
नाशिक : मंदिरातील दानपेटीचे कुलूप तोडून चोरट्यांनी रोकड चोरून नेल्याची घटना माणिकनगर भागात घडली. याप्रकरणी गंगापूर पोलीस ठाण्यात चोरीचा गुन्हा दाखल करण्यात आला आहे.
रोहित दिपक वाईकर (रा.शिवशक्ती ग्राऊंड,माणिकनगर) यांनी तक्रार दाखल केली आहे. वाईकर परिसरातील तुळजा भवानी मंदिराची देखभाल करतात. गुरूवारी (दि.११) रात्री अज्ञात चोरट्यांनी तुळजा भवानी मंदिरात प्रवेश करून देवी मुर्ती जवळील दानपेटीचे कुलूप तोडून ही चोरी केली. सकाळी ही बाब निदर्शनास आली. दानपेटीत सुमारे पंधरा हजाराची रोकड होती. अधिक तपास हवालदार भुमकर करीत आहेत.
….
तिडके कॉलनीत रोहित्र चोरी
नाशिक : वीज कंपनीचे बंद अवस्थेतील ६३ केव्हीचे रोहित्र चोरट्यांनी चोरून नेल्याची घटना तिडके कॉलनीत घडली. याप्रकरणी मुंबईनाका पोलीस ठाणाात गुन्हा दाखल करण्यात आला आहे.
वरूण प्रतिक वाघ (रा.गोविंदनगर) यांनी याप्रकरणी तक्रार दाखल केली आहे. तिडके कॉलनीतील एसएसके हॉटेल समोरील सुमारे ५५ हजार रूपये किमतीचे वीज कंपनीची डीपी (रोहित्र) चोरट्यांनी चोरून नेले. ही घटना ५ ते ९ फेब्रुवारी दरम्यान घडली. अधिक तपास पोलीस नाईक डंबाळे करीत आहेत.
