मंगल कार्यालयातून दागिणे लंपास
नाशिक – लग्नकार्यासाठी आलेल्या एकाचे बॅगेमधील ६० हजार रूपयांचे दागिणे अज्ञात चोरट्यांनी चोरून नेल्याची घटना रविवारी (दि.२९) दुपारी जेलरोडच्या भगवती लॉन्स येथे घडली. याप्रकरणी शिवाजी केदा खरे (५२, रा. सावरकरनगर, टिटवाळा, ता. कल्याण, ठाणे) यांनी तक्रार दाखल केली आहे. त्यानुसार खरे हे लग्नासाठी जेलरोडच्या भगवती लॉन्स येथे आले होते. रविवारी दुपारी त्यांच्या जवळील बॅगमधून एकुण ६० हजार रूपयांचे दागिणे अज्ञात चोरट्यांनी लंपास केले. याप्रकरणी नाशिकरोड पोलीस ठाण्यात गुन्हा दाखल करण्यात आला आहे.
……..
दुचाकी घसरून युवक ठार
नाशिक – भरधाव दुचाकी घसरून झालेल्या अपघातात युवक ठार झाल्याची घटना अंबड औद्योगिक परिसरात घडली. याप्रकरणी तब्बल पाच महिन्यांनी मृतावर गुन्हा दाखल करण्यात आला आहे. गणेश खंडू शिंदे (३२, रा. मोरवाडी ) असे या अपघातात ठार झालेल्या युवकाचे नाव आहे. पोलीसांनी दिलेल्या माहितीनुसार ६ जुन २०२० रोजी अंबड औद्योगिक वसाहतीतील गंगामाय कॉम्पलेक्स समोर दुचाकी स्लीप होऊन शिंदे हा गंभीर जखमी झाला होता ७ जुन रोजी उपचार सुरू असताना त्याचा मृत्यू झाला आहे. या प्रकरणी अंबड पोलीस ठाण्यात गुन्हा दाखल करण्यात आला आहे.
……
घरातून मोबाईल, पाकिट लंपास
नाशिक – उघड्या घरात प्रवेश करून अज्ञात चोरट्याने मोबाईल व पाकिट लंपास केल्याचा प्रकार शुक्रवारी (दि.२७) जेलरोड येथे घडला. याप्रकरणी ईश्‍वर दत्तु बनकर (१९ रा. राजराजेश्‍वरी, जेलरोड) याने तक्रार दाखल केली आहे. त्यानुसार उघड्या घरात कोणाचे लक्ष नसल्याचे पाहुण अज्ञात चोरट्याने गुपचूप प्रवेश करून मोबाईल व एटीएम, क्रेडीट कार्ड असलेले पाकिट चोरून नेले. याप्रकरणी उपनगर पोलीस ठाण्यात गुन्हा दाखल करण्यात आला आहे.
……
नदीत कचरा टाकल्याने महिलेवर गुन्हा
नाशिक : पुलावरून नदीपात्रात कचरा टाकल्याच्या कारणातून एका महिलेवर पोलीसांनी रविवारी (दि.२९) गुन्हा दाखल केला आहे. लता नाना खरात (४५, रा. कॅनोलरोड, आम्रपाली झोपडपट्टी) असे गुन्हा दाखल झालेल्या महिलेचे नाव आहे. पोलीसांनी दिलेल्या माहितीनुसार दसक येथील पुलावरून नदीपात्रात कचरा टाकला. याप्रकरणी पोलीस शिपाई सचिन बाहिकर यांनी तक्रार दाखल केली असून महिलेवर मनाई आदेशाचे उल्लंघन केल्याचा गुन्हा दाखल करण्यात आला आहे.
……..
आगीत होरपळून वृद्धेचा मृत्यू
नाशिक : नकळत घरातील पणतीला साडीचा पदर लागून पेट घेल्याने लागलेल्या आगीत ७२ वर्षीय वृद्धेचा मृत्यू झाल्याची घटना रविवारी (दि.२९) सायंकाळी पंचवटीतील तारवालनगर परिसरात घडली. सुधा नरहरी बेळगावकर (रा. मधुराम बंगला, तारवालानगर, पंचवटी) असे या घटनेत मृत्यू झालेल्या वृद्धेचे नाव आहे. पोलीसांनी दिलेल्या माहितीनुसार रविवारी सांयकाळी साडेपाच वाजेच्या सुमारास बेळगावकर या काम करत असताना पणतीला त्यांच्या साडीचा पदर लागून आग लागली यात त्या ९५ टक्के भाजल्या. उपचार सुरू असताना त्यांचा मृत्यू झाला. याप्रकरणी पंचवटी पोलीस ठाण्यात नोंद करण्यात आली आहे.
………..
एकाची आत्महत्या
नाशिक : राहते घरी गळफास घेत एकाने आत्महत्या केल्याची घटना रविवारी (दि.२९) सकाळी सातपूरच्या अशोकनगर परिसरात घडली.स्वप्निल भरत कदम (३५, रा. अशोकनगर, सातपूर ) असे आत्महत्या केलेल्या युवकाचे नाव आहे. पोलीसांनी दिलेल्या माहितीनुसार रविवारी सकाळी कदम याने घराच्या छताच्या लोखंडी हुकला दोरीच्या सहाय्याने गळफास लावून घेत आत्महत्या केली. याप्रकरणी सातपूर पोलीस ठाण्यात नोंद करण्यात आली आहे.
