नाशिक – भाभानगर येथे दोन घरफोड्या, ७५ हजाराचा ऐवज चोरीला

भाभानगर येथे दोन घरफोड्या
नाशिक : भाभानगर परिसरात घरफोड्यांचे सत्र सुरूच असून नुकतेच एक खासगी कार्यालय आणि गोडावून फोडून चोरट्यांनी सुमारे ७५ हजाराचा ऐवज चोरून नेला. याप्रकरणी मुंबईनाका पोलीस ठाण्यात घरफोडीचा गुन्हा दाखल करण्यात आला आहे.
नितीन मधूकर मोरे (रा.प्रशांतनगर,पाथर्डी फाटा) यांनी याप्रकरणी तक्रार दाखल केली आहे. मोरे यांचे भाभानगर येथील तिरूपती अपार्टमेंटमध्ये कार्यालय आहे. गुरूवारी (दि.७) रात्री अज्ञात चोरट्यांनी बंद कार्यालयाचे कुलूप तोडून दोन लॅपटॉप,तीन मोबाईल, गॅस स्टोव्ह आणि ब्ल्यू ट्युथ हेडफोन असा सुमारे २६ हजार ५०० रूपयांचा ऐवज चोरून नेला. दुसरी घटना याच भागातील शमा व्हिला या बंगल्यात घडली. आशितोष दिलीप कुचेरीया यांनी याप्रकरणी तक्रार दाखल केली आहे. कुचेरीया यांचे ज्योती इंटरप्रायझेस नावाचे गोडावून शमा व्हिला या बंगल्यात आहे. गुरूवारी रात्री अज्ञात चोरट्यांनी गोडावूनचे कुलूप तोडून दोन लॅपटॉप,सीसीटिव्ही कॅमेºयांचा डिव्हीआर तसेच २० हजाराची रोकड असा सुमारे ४८ हजार रूपयांचा ऐवज चोरून नेला. दोन्ही घरफोडींप्रकरणी एकत्र गुन्हा दाखल करण्यात आला असून अधिक तपास सहाय्यक निरीक्षक गेंगजे करीत आहेत.

…..
उघड्या घरातून रोकडसह मोबाईल चोरी
नाशिक : उघड्या घरात शिरून चोरट्यांनी टेबलावर ठेवलेल्या रोकडसह दोन मोबाईल असा सुमारे २२ हजाराचा ऐवज चोरून नेला. ही घटना फकिरवाडीत घडली. याप्रकरणी भद्रकाली पोलीस ठाण्यात चोरीचा गुन्हा दाखल करण्यात आला आहे. सलीम कैसरअली सय्यद (रा.अजमेरी मस्जिद जवळ,फकिरवाडी) यांनी याप्रकरणी तक्रार दाखल केली आहे. सय्यद कुटूंबिय गेल्या सोमवारी (दि.४) आपल्या कामत व्यस्त असतांना ही घटना घडली. अर्धवट उघड्या असलेल्या दरवाजातून शिरत चोरट्यांनी ही चोरी केली. दरवाजा अर्धवट उघडा असल्याची संधी साधत अज्ञात भामट्याने हॉलमधील टेबलावर ठेवलेले ११ हजार ४०० रूपयांची रोकड आणि दोन मोबाईल असा सुमारे २१ हजार ४०० रूपयांचा ऐवज पळवून नेला. अधिक तपास उपनिरीक्षक पवार करीत आहेत.

…………
गुरूद्वारा परिसरातून पल्सर चोरी
नाशिक : सोसायटीच्या पार्किंगमध्ये लावलेली पल्सर मोटारसायकल चोरट्यांनी चोरून नेली. ही घटना गुरूद्वारा रोड भागात घडली. याप्रकरणी मुंबईनाका पोलीस ठाण्यात गुन्हा दाखल करण्यात आला आहे. ऋषीकेश दादासाहेब तायडे (रा.गुरूद्वारारोड) यांनी याप्रकरणी तक्रार दाखल केली आहे. तायडे यांची पल्सर (एमएच १५ ईटी ३३५०) गेल्या बुधवारी (दि.६) रात्री त्यांच्या अपार्टमेंटच्या पार्किंगमध्ये लावलेली असतांना चोरट्यांनी चोरून नेली. अधिक तपास पोलीस नाईक पवार करीत आहेत.

……………
महिलेच्या मृतदेहाबाबत पोलीसांचे आवाहन
नाशिक : गोदापात्रात मिळून आलेल्या ३५ ते ४० वयोगटातील अनोळखी महिलेची अज्ञात ओळख पटली नसून माहितगारांनी अथवा नातेवाईकांनी पंचवटी पोलीसांशी संपर्क साधावा असे आवाहन करण्यात आले आहे.
गुरूवारी (दि.७) सकाळच्या सुमारास रामवाडी पुलाजवळील सार्वजनिक शौचालयाच्या पाठीमागील नदी पात्रात ३५ ते ४० वयोगटातील अनोळखी महिलेचा मृतदेह मिळून आला आहे. या महिलेची अद्याप ओळख पटली नसून ती शरिराने मध्यम,उंचा पाच फुट १ इंच,रंगनाने गोरी,चेहरा गोल अश्या वर्णनाची असून तिने अंगात लाल ब्लाऊज आणि राखाडी साडी परिधान केलेली आहे. सदर महिलेबाबत माहिती असल्यास संपर्क साधावा असे आवाहन पोलीस कर्मचारी डी.पी.नाईक यांनी केले आहे.
……………..