नाशिक – घरफोडी करीत सुमारे साडे पाच लाखांचा ऐवज लंपास केल्याची घटना भाभानगर परिसरात घडली. चोरट्याने खिडकीतून हात टाकून दरवाजाची कडी काढून ही घरफोडी केली. विजय तुळशीराम कंक्राळे (४३,रा. भाभानगर) यांच्या फिर्यादीनुसार चोरट्याने रविवारी (दि.७) दुपारच्या सुमारास दरवाजा उघडून घरातील ४ लाख १९ हजार रुपयांची रोकड आणि ५ तोळे वजनाचे सोन्याचे दागिने असा एकूण ५ लाख ४४ हजार रुपयांचा ऐवज लंपास केला. याप्रकरणी मुंबईनाका पोलीस तपास करीत आहेत.
…..
नाशिक – काठेगल्ली येथील बनकर चौकात राहणाऱ्या ३९ वर्षीय व्यक्तीने राहत्या घरात गळफास घेतला. गगन बहादूर रावत असे आत्महत्या केलेल्या व्यक्तीचे नाव आहे. रावत यांनी रविवारी (दि.७) सायंकाळच्या सुमारास गळफास घेतल्याचे आढळून आले. याप्रकरणी भद्रकाली पोलीस ठाण्यात आकस्मिक मृत्यूची नोंद करण्यात आली आहे.
….
नाशिक – मागील भांडणाची कुरापत काढून एकाने ७० वर्षीय वृद्ध व्यक्तीस मारहाण केल्याची घटना गंगापूर रोडवरील थत्तेनगर परिसरात घडली. याप्रकरणी नामदेव महादू मुसळे (७०, रा. श्रमिक हौसिंग सोसायटी, गंगापूर रोड) यांच्या फिर्यादीनुसार संशयित विशाल दिलीप शिंदे (४७, रा. श्रमिक हौसिंग सोसायटी) यांनी कुरापत काढून शिवीगाळ करीत स्टीलच्या कड्याने कपाळावर मारहाण केली. तसेच धमकावले. याप्रकरणी गंगापूर पोलीस तपास करीत आहेत.
……
नाशिक – पंचशिल नगर येथील सार्वजनिक सुलभ शौचालयात गंगाराम अर्जुन जाधव (३५) यांनी गळफास घेत आत्महत्या केली. गंगाराम यांनी रविवारी (दि.७) सकाळच्या सुमारास शौचालयाच्या खिडकीला गळफास घेतल्याचे आढळून आले. याप्रकरणी भद्रकाली पोलीस ठाण्यात आकस्मिक मृत्यूची नोंद करण्यात आली आहे.
