भांडीबाजारात एकावर हल्ला
नाशिक : आईस वाईट बोलल्याचा जाब विचारल्याने एकाने मुलास बेदम मारहाण करीत त्याच्यावर धारदार शस्त्राने वार केल्याची घटना भांडीबाजारात घडली. याप्रकरणी सरकारवाडा पोलीस ठाण्यात गुन्हा दाखल करण्यात आला आहे.
बाबू (रा.मुरलीधर मंदिरासमोर) असे संशयीताचे नाव आहे. याप्रकरणी चेतन विकास पवार (२४ रा.देशमुखवाडा,मुरलीधर मंदिरासमोर) या युवकाने तक्रार दाखल केली आहे. चेतन पवार याची आई बुधवारी (दि.६) आपल्या घरासमोरील सार्वजनिक नळावर पाणी भरण्यासाठी गेली असता ही घटना घडली. नळावर आलेल्या संशयीताने महिलेस वाईट साईट बोलला. त्यामुळे चेतन त्यास जाब विचारण्यासाठी गेला असता संशयीताने त्यास लाथाबुक्यांनी मारहाण केली. यावेळी संतप्त संशयीताने धारदार शस्त्राने त्याच्यावर वार केल्याने युवक जखमी झाला असून अधिक तपास हवालदार शेळके करीत आहेत.
………
अंबडला एकाची आत्महत्या
नाशिक : औद्योगीक वसाहतीतील अंबड लिंक रोड भागात राहणा-या ४० वर्षीय इसमाने गळफास लावून घेत आत्महत्या केली. सदर व्यक्तीच्या आत्महत्येचे कारण समजू शकले नाही. याप्रकरणी अंबड पोलीस ठाण्यात मृत्युची नोंद करण्यात आली आहे. अनिल तुकाराम माने (रा.विठ्ठल मंदिरामागे,जाधव संकुल) असे आत्महत्या करणा-या व्यक्तीचे नाव आहे. अनिल माने यांनी बुधवारी (दि.६) दुपारच्या सुमारास आपल्या राहत्या घरात अज्ञात कारणातून पंख्यास साडी बांधून गळफास लावून घेतला होता. त्यात त्याचा मृत्यु झाला. अधिक तपास हवालदार टोपले करीत आहेत.
…….
हॉटेल मालकास मारहाण
नाशिक : बिलात सुट दिली नाही या कारणातून ग्राहकांनी हॉटेल मालकास लोखंडी पाईपाने बेदम मारहाण केल्याची घटना नाशिक पुणे मार्गावरील शिंदे गावात घडली. या घटनेत हॉटेल मालकाची सोन्याची अंगठी गहाळ झाली असून याप्रकरणी नाशिकरोड पोलीस ठाण्यात गुन्हा दाखल करण्यात आला आहे. अंकुश गायखे, सागर चौधरी व त्यांची दोन साथीदार अशी संशयीतांची नावे आहेत. याप्रकरणी तुषार बाळासाहेब ढिकले (रा.कोनार्क नगर) यांनी तक्रार दाखल केली आहे. ढिकले यांचे नाशिक पुणे मार्गावरील शिंदे गावात स्फुर्ती नावाचे हॉटेल आहे. मंगळवारी (दि.५) रात्री ढिकले आपले हॉटेल वाढवत असतांना ही घटना घडली. हॉटेलचे प्रवेशद्वार लावत असतांना संशयीतांनी आम्हाला डिस्काऊंट का दिला नाही या कारणातून वाद घातला. यावेळी संतप्त टोळक्याने शिवीगाळ करीत हॉटेलच्या गेटला लाथामारून ढिकले यांना धक्काबुक्की केली. यावेळी ढिकले यांनी गांभीर्य ओळखून नजीकच्या आप्पा ढाब्याकडे पळ काढला असता टोळक्याने पकडून त्यांना बेदम मारहाण केली. त्यातील एकाने त्यांच्या डोक्यात व पाठीवर लोखंडी पाईप मारल्याने ढिकले जखमी झाले असून या घटनेत ढिकले यांच्या बोटातील सोन्याची अंगठी गहाळ झाली. अधिक तपास हवालदार गांगुर्डे करीत आहेत.
……
दारूच्या नशेत पडल्याने एकाचा मृत्यु
नाशिक : मद्याच्या नशेत घराच्या पायरीवर पडल्याने ४४ वर्षीय इसमाचा मृत्यु झाला. ही घटना द्वारका भागात घडली. याप्रकरणी भद्रकाली पोलीस ठाण्यात मृत्युची नोंद करण्यात आली आहे. नितीन नाना इंगळे (रा.रामराज्य सोसा. टॅक्टर हाऊस जवळ) असे मृत व्यक्तीचे नाव आहे. इंगळे यांना मद्यपानाचे व्यसन होते. बुधवारी (दि.६) ते दारू सेवन करून आपल्या घरी गेले असता ही घटना घडली. मद्याच्या नशेत पायरीवरून पाय घसरून पडल्याने ते गंभीर जखमी झाले होते. या घटनेत त्यांच्या नाका तोंडातून रक्त आल्याने कुटूंबियांनी त्यांना तात्काळ जिल्हा रूग्णालयात दाखल केले असता वैद्यकीय सुत्रांनी मृत घोषीत केले. अधिक तपास पोलीस नाईक शेख करीत आहेत.
…….
महिलेची आत्महत्या
नाशिक : सातपूर कॉलनी भागात राहणा-या २८ वर्षीय महिलेने आपल्या राहत्या घरात गळफास लावून घेत आत्महत्या केली. महिलेच्या आत्महत्येचे कारण समजू शकले नाही. याप्रकरणी सातपूर पोलीस ठाण्यात मृत्युची नोंद करण्यात आली आहे. मिराबाई समाधान पाटील (रा.सातपूर कॉलनी,मुळ रा.फलाने जि.जळगाव) असे मृत महिलेचे नाव आहे. मिराबाई पाटील यांनी बुधवारी (दि.६) आपल्या राहत्या घरात अज्ञात कारणातून लोखंडी अडगळीला साडी बांधून गळफास लावून आत्महत्या केली. ही बाब सकाळच्या सुमारास उघडकीस आली. याप्रकरणी अशोक उचले यांनी दिलेल्या खबरीवरून मृत्युची नोंद करण्यात आली असून अधिक तपास हवालदार देवरे करीत आहेत.
……..
