बुलेटच्या धडकेत पादचारी जखमी
नाशिक – भरधाव बुलेटने दिलेल्या धडकेत पादचारी जखमी झाल्याची घटना सोमवारी (दि.९) विनयनगर बसस्टॉपजवळ घडली. याप्रकरणी विनयनगर येथील मिलिंद निकवाडे यांनी मुंबई नाका पोलीस ठाण्यात तक्रार दिली. त्यानुसार पोलिसांनी चिंचोळे, अंबड येथील संशयित वृषभ राजेश शर्मा (२२) याच्याविरोधात गुन्हा दाखल केला आहे. पोलिसांनी दिलेल्या माहितीनुसार, मिलिंद निकवाडे यांचे वडील यशवंत निकवाडे पायी रस्ता ओलांडत होते. त्यावेळी वृषभ भरधाव वेगाने बुलेट घेवून आला. त्याने बुलेटची यशवंत निकवाडे यांना धडक दिली. त्यात ते जखमी झाले. पुढील तपास पोलीस हवालदार गवळी करत आहेत.
…….
भिंत तोडण्यास विरोध केला म्हणून ठार मारण्याची धमकी
नाशिक – इमारत पूर्णत्वाचा दाखला मिळाला नसतानाही भिंत तोडण्यास एकाने हटकले असता राग अनावर झाल्याने एकजणाने भिंत तोडण्यास विरोध केला तर ठार मारीन अशी धमकी दिल्याची घटना बुधवारी (दि.११) दुपारी ३ वाजेदरम्यान अजमेरी चौक, नाईकवाडीपुरा, भद्रकाली येथे घडली. याप्रकरणी आसिफ शेख यांनी भद्रकाली पोलीस ठाण्यात तक्रार दिली. त्यानुसार पोलिसांनी विनयनगर येथील संशयित जियिउद्दीन तैय्यब शेख (वय ३३) यास अटक केली आहे. पोलिसांनी दिलेल्या माहितीनुसार, आसिफ शेख इमारतीजवळ गेले असता संशयित शेख गाळ्याला शटर लावून भिंत तोंडत असल्याचे दिसून आले. इमारत पूर्णत्वाचा दाखला मिळण्यासाठी फाईल दिली असून गाळ्याची भिंत तोडू नका. गाळ्याला शटर लावू नका. तुम्ही जर भिंत तोडली तर इमारत पूर्णत्वाचा दाखला मिळणार नाही. बांधकाम केल्यास दंड होईल, असे आसिफ शेख यांनी जियीउद्दीन शेख यास सांगितले. मात्र, जियीउद्दीन शेख याने त्यांचे म्हणणे ऐकले नाही. तुला काय करायचे ते करुन घे, तू जर भिंत तोडण्यास विरोधा केला तर ठार मारील, अशी धमकी त्याने आसिफ शेख यांना दिली. पुढील तपास पोलीस उपनिरीक्षक गवळी करत आहेत.
……
२० दिवस मुलीवर बलात्कार करणारा गजाआड
नाशिक – घरात कुणी नसल्याची खात्री करत एकाने मुलीवर वारंवार बलात्कार केल्याची घटना उघडकीस आली आहे. याप्रकरणी महिलेने म्हसरुळ पोलीस ठाण्यात तक्रार दिली. त्यानुसार पोलिसांनी वैतागवाडी, म्हसरुळ येथील संशयितला अटक केली आहे. पोलिसांनी दिलेल्या माहितीनुसार, संशयित घरात कुणी नसल्याची खात्री करुन पीडित मुलीच्या घरात घुसायचा. त्याने २२ ऑक्टोबर ते ११ नोव्हेंबर या कालावधीत मुलीवर वारंवार बलात्कार केला. पुढील तपास सहायक पोलीस निरीक्षक एस. एन. भडीकर करत आहेत.
……
जाब विचारल्याने कानाचा घेतला लचका
नाशिक – भावजई व आईस शिवीगाळ व मारहाण केल्याचा जाब विचारणे एकाला चांगलेच महागात पडले. रागाच्या भरात एकाने दुसर्‍याच्या कानाचा लचका घेतल्याची घटना बुधवारी (दि.११) पांडे निवास, संगमेश्वर नगर, चेहडी पंपिंग, नाशिकरोड येथे घडली. याप्रकरणी चेहडी पंपिंग, नाशिकरोड येथील मधुकर विठोबा राव यांनी नाशिकरोड पोलीस ठाण्यात तक्रार दाखल केली. त्यानुसार चेहडी पंपिंग, नाशिकरोड येथील पोलिसांनी संशयित यादव क्षिरसागर याच्यावर गुन्हा दाखल केला आहे. पोलिसांनी दिलेल्या माहितीनुसार, मद्यधुंद अवस्थेत यादव क्षिरसागर याने मधुकर राव यांच्या भावजई व आईस शिवीगाळ करत मारहाण केली. याप्रकरणी राव यांनी जाब विचारला असता राग अनावर झाल्याने क्षिरसागर याने त्यांचा उजव्या कानाचा लचका घेतला. तुला बघून घेतो, असे धमकी त्याने राव यांना दिली. पुढील तपास पोलीस हवालदार व्ही. पी. उजागरे करत आहेत.
