बंगला फोडून नळ चोरी
नाशिक : बंद बंगला फोडून चोरट्यांनी घरातील नळ आणि प्लंबिग सामान चोरून नेल्याची घटना सिडकोतील बडदेनगर येथे घडली. याप्रकरणी अंबड पोलीस ठाण्यात घरफोडीचा गुन्हा दाखल करण्यात आला आहे. शशांक दिगंबर पगार (रा.मेडिकल कॉलेज आडगाव) यांनी तक्रार दाखल केली आहे. पगार यांचा बडदेनगर येथील इच्छामनी कॉलनीत शमी नावाचा बंगला आहे. सोमवारी (दि.२२) अज्ञात चोरट्यांनी बंद बंगल्याच्या गच्चीच्या दरवाजाचा कडीकोयंडा तोडून ही चोरी केली. बंगल्यात शिरलेल्या चोरट्यांनी टॉयलेट बाथरूमसह बेसिंगला लावलेले जॅगवार कंपनीचे नळ आणि प्लंबिगचे सामान असा सुमारे २० हजाराचा ऐवज चोरून नेला. अधिक तपास हवालदार शेख करीत आहेत.
……
जुन्या वादातून एकावर कोयत्याने हल्ला
नाशिक : जुन्या भांडणाची कुरापत काढून एकाने तरूणाच्या डोक्यात कोयता मारून दुखापत केल्याची घटना चेहडी पंपीग परिसरात घडली. याप्रकरणी नाशिकरोड पोलीस ठाण्यात गुन्हा दाखल करण्यात आला आहे.
संकेत पगारे (रा.गुलाबवाडी देवळालीगाव) असे कोयत्याने हल्ला करणा-या संशयीताचे नाव आहे. याप्रकरणी आकाश राजेंद्र जाधव (२२ रा.मराठा कॉलनी,चेहडी पंपीग) या युवकाने तक्रार दाखल केली आहे. जाधव सोमवारी (दि.२२) रात्री वडिलांसाठी औषधे घेण्यासाठी मेडिकल स्टोअर्स मध्ये जात असतांना ही घटना घडली. वाटेत भेटलेल्या संशयीताने जुन्या भांडणाची कुरापत काढून जाधव याच्या डोक्यात कोयता मारला. या घटनेत तो जखमी झाला असून अधिक तपास हवालदार नागरे करीत आहेत.
…
