टोळक्याकडून एकास मारहाण
नाशिक : घराकडे पायी जाणा-या दोघा मित्रांना टोळक्याने बेदम मारहाण केल्याची घटना फाळके रोड भागात घडली. या घटनेत एकास दगड मारून फेकल्याने तो जखमी झाला असून याप्रकरणी भद्रकाली पोलीस ठाण्यात मारहाणीचा गुन्हा दाखल करण्यात आला आहे.
सिफतेन खान,मुजीब खान,जुनेद खान व अन्य साथीदार अशी संशयीतांची नावे आहेत. याप्रकरणी परवेश मुक्तार काकर (१८ रा.रॉबिन बिस्कीट जवळ,बागवानपुरा) या युवकाने तक्रार दाखल केली आहे. काकर व त्याचा मित्र बुधवारी (दि.३) सायंकाळच्या सुमारास फाळके रोडने आपल्या घराकडे पायी जात असतांना ही घटना घडली. रस्त्यात भेटलेल्या वरिल टोळक्याने कुठलेही कारण नसतांना दोघा मित्रांना शिवीगाळ केली. यावेळी उपस्थितांनी वाद मिटविल्याने या घटनेवर पडदा पडला होता. मात्र दोघे मित्र पूढे जात असतांना संशयीतांनी जहागिर कब्रस्तान येथे पुन्हा गाठून दोघा मित्रांना लाथाबुक्यांनी मारहाण केली. या घटनेत एकास दगड मारून फेकल्याने तो जखमी झाला असून अधिक तपास जमादार इशी करीत आहेत.
…….
कारचालकास मारहाण
नाशिक : कट मारल्याच्या कारणातून टोळक्याने कारचालकास बेदम मारहाण केल्याची घटना जहांगिर कब्रस्तान भागात घडली. या घटनेत चालक जखमी झाला असून याप्रकरणी भद्रकाली पोलीस ठाण्यात मारहाणीचा गुन्हा दाखल करण्यात आला आहे. अरबाज शेख,हरजोतसिंह ओबराई व त्यांचे दोन साथीदार अशी कारचालकास मारहाण करणा-या संशयीतांची नावे आहेत. याप्रकरणी वृंद विपूल पटेल (२० रा.दिंडोरीनाका) या युवकाने तक्रार दाखल केली आहे. पटेल बुधवारी (दि.३) फाळके रोडने आपल्या कारमधून प्रवास करीत असतांना ही घटना घडली. जहांगिर कब्रस्तान येथील अमीर लॉज परिसरात संशयीतांनी कार अडवून कट मारण्याच्या कारणातून वाद घातला. यावेळी संशयीतांनी शिवीगाळ व जीवे मारण्याची धमकी देत पटेल यास लाथाबुक्यांनी मारहाण केली. या घटनेत संशयीतांपैकी एकाने लाकडी दांडक्याने डोक्यात प्रहार केल्याने तो जखमी झाला असून अधिक तपास हवालदार शेख करीत आहेत.
……..
फळविक्रेत्याकडून कोयत्याने हल्ला
नाशिक : दुकानासमोर गाडा लावण्यास मनाई केल्याने संतप्त फळविक्रेत्याने एका व्यावसायीकावर कोयत्याने हल्ला केल्याची घटना दुर्गा गार्डन भागात घडली. याप्रकरणी नाशिकरोड पोलीस ठाण्यात गुन्हा दाखल करण्यात आला आहे. दशरथ ठाकूर असे संशयीत फळविक्रेत्याचे नाव आहे. याप्रकरणी सलीम निजाम शेख (रा.भोरमळा) यांनी तक्रार दाखल केली आहे. शेख यांचे महापालिका कार्यालय परिसरातील दुर्गा गार्डन भागात व्यवसाय आहे. बुधवारी (दि.३) ते आपल्या दुकानात बसलेले असतांना ही घटना घडली. संशयीताने आपला फळविक्रीचा हातगाडा शेख यांच्या दुकानासमोर लावल्याने त्यांनी त्यास गाडा हलविण्यास लावल्याने ही घटना घडली. दुकानासमोर हातगाडी लावू नको असे शेख यांनी बजावले असता संशयीताने शिवीगाळ करीत हातगाडीवरील कोयता घेवून शेख यांच्या पाठीवर वार केला. या घटनेत शेख जखमी झाले असून अधिक तपास हवालदार भालेराव करीत आहेत.
…….
महागडी सायकल चोरी
नाशिक : जेलरोड परिसरात भुरट्या चो-या वाढल्या असून सोसायटीच्या पार्किंगमध्ये उभी असलेली महागडी सायकल चोरट्यांनी पळवून नेली. याप्रकरणी नाशिकरोड पोलीस ठाण्यात चोरीचा गुन्हा दाखल करण्यात आला आहे. अनिल रंभाजी निरभवणे (रा.वसंत रजनी सोसा.सदगुरूनगर,पंचक) यांनी याप्रकरणी तक्रार दाखल केली आहे. निरभवणे यांची डीएनएस कंपनीची महागडी सायकल गुरूवारी (दि.४) सायंकाळच्या सुमारास त्यांच्या सोसायटीच्या पार्किंगमध्ये लावलेली असतांना चोरट्यांनी चोरून नेली. अधिक तपास हवालदार शिंदे करीत आहेत.
…
