नाशिक : शहरात आत्महत्येचे सत्र सुरूच असून,ऐन सणासुदीच्या काळात वेगवेगळ्या भागात राहणा-या तीन तरूणांनी गळफास लावून घेत आत्महत्या केली. मृतांच्या आत्महत्येचे कारण समजू शकले नाही. याप्रकरणी पंचवटी,मुंबई नाका आणि उपनगर पोलीस ठाण्यात मृत्युची नोंद करण्यात आली आहे. पेठरोडवरील फुलेनगर भागात राहणा-या सुरज अशोक कर्डक (२५ रा.वैशालीनगर) या युवकाने सोमवारी (दि.१६) रात्री अज्ञात कारणातून आपल्या राहत्या घरात गळफास लावून घेतला होता. ही बाब लक्षात येताच कुटूंबियांनी त्यास जिल्हा रूग्णालयात दाखल केले असता वैद्यकीय सुत्रांनी मृत घोषीत केले. याप्रकरणी पंचवटी पोलीस ठाण्यात गुन्हा दाखल करण्यात आला असून अधिक तपास हवालदार शेळके करीत आहेत. दुसरी घटना अशोकामार्ग भागात घडली. हेमंत मोहन विधाते (२६ रा.स्वप्नपूर्ती रो हाऊस,कल्पतरूनगर) या युवकाने मंगळवारी (दि.१७) सायंकाळच्या सुमारास आपल्या राहत्या घरी गळफास लावून घेतला होता. कुटूंबियांनी त्यास तात्काळ नजीकच्या सह्याद्री हॉस्पिटल येथे दाखल केले असता त्याचा मृत्यु झाला. सदर युवकाच्या मृत्युचे कारण समजू शकले नाही. याप्रकरणी मुंबईनाका पोलीस ठाण्यात मृत्युची नोंद करण्यात आली असून अधिक तपास हवालदार घुगे करीत आहेत. तिसरी घटना धाडेगाव येथे घडली. स्वप्नील नंदू सोनवणे (२१ रा.धाडेगाव – पिंपळगाव खांब,ना.रोड) या युवकाने मंगळवारी (दि.१७) आपल्या राहत्या घरी अज्ञात कारणातून लाकडी सरईला दोरी बांधून गळफास लावून घेतला होता. कुटूंबियांनी त्यास जयराम हॉस्पिटल येथे प्रथमोपचार करून अधिक उपचारार्थ जिल्हारूग्णालयात दाखल केले असता वैद्यकीय सुत्रांनी मृत घोषीत केले. याप्रकरणी उपनगर पोलीस ठाण्यात मृत्युची नोंद करण्यात आली असून अधिक तपास हवालदार माळोदे करीत आहेत.
