दोन गतीमंद बालकांचे अपहरण
नाशिक : शहरातील तवलीफाटा येथील मतीमंद विद्यालयातून दोन अल्पवयीन भावांचे अपहरण झाल्याची घटना शनिवारी (दि.३०) रात्री घडली आहे. गोपी राजेंद्र अपसुंदे (१०) व गोरख राजेंद्र अपसुंदे (१२, रा. दोघेही पाडा. ता. दिंडोरी) अशी अपहरण झालेल्या बालकांची नावे आहेत. याप्रकरणी शिक्षक विश्वास वामन आहिरे (४१, रा. वाघोली, पुणे, सध्या मतीमंद विद्यालय, तवलीफाटा) यांनी तक्रार दाखल केली आहे. त्यानुसार दोघे भाऊ गतीमंद असून ते तवलीफाटा येथील निवासी शाळेत होते. शनिवारी रात्री दोघेही कोणास काही न सांगता शाळेबाहेर पडले. यानंतर त्यांना अज्ञात व्यक्तीने फुस लावून पळवून नेल्याची शक्यता व्यक्त करण्यात आली आहे. याप्रकरणी म्हसरूळ पोलीस ठाण्यात गुन्हा दाखल करण्यात आला आहे. अधिक तपास सहायक निरिक्षक आहिरे करत आहेत.
…..
शिवाजीनगरला घरफोडी
नाशिक : बंद घराचे कुलूप तोडून घरात प्रवेश करत चोरट्यांनी ९९ हजार रूपयांचे दागिणे व रोकड असा ऐवज चोरून नेल्याची घटना शनिवारी (दि.३०) रात्री सातपूरच्या शविाजीनगर भागात घडली. याप्रकरणी संतोष मधुकर सोनवणे (३६, रा. मनपा शाळे शेजारी) यांनी तक्रार दाखल केली आहे. त्यानुसार सोनवणे कुटुंबिय बाहेरगावी गेल्याचा फायदा उचलत अज्ञात चोरट्यांनी शनिवारी रात्री घराचा मुख्य दरवाजाचे कुलूप तोडून घरात प्रवेश केला. लोखंडी कपाटातील तिजोरीत ठेवलेले दागिणे व रोकड असा ९९ हजाराचा ऐवज घेऊन चोरट्यांनी पोबारा केला. याप्रकरणी गंगापूर पोलीस ठाण्यात गुन्हा दाखल करण्यात आला आहे. अधिक तपास पोलीस हवालदार भुमकर करत आहेत.
…..
रेल्वेच्या धडकेत एकाचा मृत्यू
नाशिक : भरधाव रेल्वेची धडक बसल्याने एकाचा मृत्यू झाल्याची घटना देवळाली कॅम्प परिसरात घडली. याप्रकरणी रेल्वे स्टेशन प्रबंधक आदित्य कुमार यांनी तक्रार दाखल केली आहे. त्यानुसार रविवारी रात्री साडेदहा वाजेच्या सुमारास देवळाली कॅम्प परिसरात रेल्वे लाईन पोली क्रमांक १७५- ३५ ते १७५- ३७ दरम्यान एका २० वर्षीय युवकाचा मृतदेह आढळून आला आहे. त्याचा रेल्वेच्या धडकेत मृत्यू झाल्याचा अंदाज वर्तवण्यात आला आहे. या प्रकरणी देवळाली कॅम्प पोलीस ठाण्यात नोंद करण्यात आली आहे. अधिक तपास पोलीस हवालदार एम. जी. मडके करत आहेत.
……
दुकान फोडून दोन दुचाकी लंपास
नाशिक : दुकानाचे शटर तोडून चोरट्यांनी विक्रीसाठी ठेवलेल्या ८० हजार रूपये किंमतीच्या जुन्या ३ दुचाकी लंपास केल्याचा प्रकार मालेगाव स्टॅण्ड परिसरात शनिवारी (दि.३०) रात्री घडला.
याप्रकरणी संजय विष्णुपंत पगारे (रा. टकलेनगर, पंचवटी) यांनी तक्रार दाखल केली आहे. त्यानुसार पगारे यांचे जुन्या दुचाकी विक्रीचा कपालेश्वार वाहन बाजार नावाने व्यवसाय आहे. शनिवारी ते दुकान बंद करून गेले असता मध्यरात्री अज्ञात चोरट्यांनी दुकानाचे शटर व जाळी तोडून आतील बजाज पल्सर (क्र. एमएच १५ एफएक्स७१९७) व आपाची (क्र. एमएच १५, जीबी ९६९९) अशा दोन दुचाकी चोरून नेल्या. याप्रकणी पंचवटी पोलीस ठाण्यात गुन्हा दाखल करण्यत आला आहे. अधिक तपास पोलीस हवालदार व्ही. डी. पाटील करत आहेत.
……
टोळक्याकडून गाडीची तोडफोड
नाशिक : ओव्हरटेक करून दिले नाही या कारणातून पाच जणांच्या टोळक्याने एका युवकास गाडी आडवी लावून चारचाकीच्या काचा फोडल्याची घटना गंगापूर रोडवरील प्रसाद सर्कल येथे घडली.
याप्रकरणी नचिकेत किरण बिडकर (१९, रा. तिडके कॉलनी) याने तक्रार दाखल केली आहे. त्यानुसार नचीकेत हा शनिवारी रात्री दहा वाजेच्या सुमारास त्याच्या ताबतील टाटा टीआयगो कार ने घरी जात असताना पाठीमागून आलेल्या कार क्र. एमएच १५, बी.एन.९११९ मधील पाच जणांच्या टोळक्याने प्रसाद सर्कल येथे त्याची कार आडवून आम्हाला ओव्हरटेक करून दिले नाही. या रागातून
त्याच्या गाडीच्या काचा फोडल्या. तसेच शिवीगाळ करत जीवे ठार मारण्याची धमकी दिली. याप्रकरणी गंगापूर पोलीस ठाण्यात गुन्हा दाखल करण्यात आला आहे. अधिक तपास एन. व्ही. बैसाने करत आहेत.
