नाशिक – ट्रकमधून ९ हजार रुपयाच्या डिझेलची चोरी तर दुस-या घटनेत मद्यसेवन पडले महागात

ट्रकमधून डिझेल चोरी
नाशिक : पार्क केलेल्या मालट्रक मधून चोरट्यांनी शंभर लिटर डिझेलची चोरी केल्याची घटना नवीन आडगावनाका भागात घडली. याप्रकरणी पंचवटी पोलीस ठाण्यात चोरीचा गुन्हा दाखल करण्यात आला आहे. प्रसाद मधुकर व्यास (रा.गुंजाळनगर,मेरी हिरावाडी लिंकरोड) यांनी याप्रकरणी तक्रार दाखल केली आहे. व्यास यांचा मालट्रक (एमएच १५ बीजे ००३८) मंगळवारी (दि.२३) दुपारच्या सुमारास नवीन आडगाव नाका येथील रोडलाईन्स ट्रान्सपोर्ट येथे पार्क केलेला असतांना ही घटना घडली. कारमधून आलेल्या अज्ञात तीन भामट्यांनी ट्रकच्या डिझेल टँकमधील सुमारे ९ हजार रूपये किमतीचे १०० लिटर डिझेल नळीच्या सहाय्याने मोठ्या ड्रममध्ये काढून घेत कारमधून पोबारा केला. ही घटना सायंकाळी उघडकीस आली. अधिक तपास जमादार ठाकरे करीत आहेत.

…..

मारहाण करीत व्यावसायीकास लुटले, मद्यसेवन पडले महागात 
नाशिक : मद्यसेवन करीत बसलेल्या व्यावसायीकास दुचाकीने नदी काठी घेवून जात बेदम मारहाण करीत लुटल्याची घटना द्वारका परिसरात घडली. या घटनेत तीन जणांच्या टोळक्याने जखमी व्यावसायीकाच्या खिशातील ४८ हजाराची रोकड आणि मोबाईल काढून घेत पोबारा केला असून याप्रकरणी भद्रकाली पोलीस ठाण्यात लुटमारीचा गुन्हा दाखल करण्यात आला आहे.
तौफिक चांद सय्यद (रा.मालेगाव) यांनी याप्रकरणी तक्रार दाखल केली आहे. सय्यद व्यावसायीक असून गेल्या शुक्रवारी (दि.१२) खरेदीसाठी ते शहरात आले होते. दुपारच्या सुमारास ते द्वारका परिसरातील मथुरा बार येथे मद्यसेवन करीत असतांना एकाने त्यांना गाठले. यावेळी संशयीताने त्यांना आपल्या दुचाकीवर नजीकच्या गोदावरी नदी पात्रावरील उड्डाणपुलाखाली नेले. या ठिकाणी संशयीताने दोन साथीदारांना बोलावून घेत हे कृत्य केले. मद्याच्या नशेत असलेल्या सय्यद यांना एकाने पाठीमागून लाकडी दांडा मारून जखमी केले तर उर्वरीत दोघांना लाथाबुक्यांनी मारहाण करीत त्यांच्या खिशातील ४८ हजाराची रोकड आणि महागडा मोबाईल काढून घेत त्रिकुटाने पोबारा केला. अधिक तपास उपनिरीक्षक जोनवाल करीत आहेत.