नाशिक जिल्ह्यातील कृषी उत्पन्न बाजार समित्यांमध्ये कांद्याच्या भावात घसरण

नाशिक – जिल्ह्यातल्या प्रमुख कृषी उत्पन्न बाजार समित्यांमध्ये आज कांद्याचे भाव घसरले. मनमाड कृषी उत्पन्न बाजार समितिमध्ये कांद्याच्या भावात क्विंटलमागे तब्बल ७०० रूपयांची घसरण झाली.

शनिवारी ३ हजार ८०० रूपये क्विंटल असलेला कांदा आज ३ हजार १०० रूपये क्विंटलने विकला गेला. ४८२ ट्रॅक्टरची प्रचंड आवक झाल्याने कांद्याचे भाव गडगडल्याचे बाजार सूत्रांनी सांगितले.

आज उन्हाळ कांद्याला १ हजार ते ३ हजार ६११, अर्थात सरासरी ३ हजार १०० रूपये तर लाल कांद्याला १ हजार ६०० ते ४ हजार, म्हणजे सरासरी ३ हजार ६०० रूपये क्विंटल असे भाव होते.

लासलगाव बाजार समितीच्या आवारातही उन्हाळ कांद्याचे भाव ७५०, तर लाल कांद्याचे भाव ३०० रुपयांनी घसरले. आज लाल कांद्याला सरासरी ३ हजार ८०० तर उन्हाळ कांद्याला ४ हजार ४०० रुपये भाव मिळाला.