घरात घुसून टोळक्याकडून एकास मारहाण
नाशिक : घरासमोर सुरू असलेल्या मारहाणीची माहिती पोलीसांना कळविल्याच्या संशयातून टोळक्याने एकास घरात घुसून बेदम मारहाण केल्याची घटना दिंडोरीरोडवरील राजदूतनगर भागात घडली. याप्रकरणी पंचवटी पोलीस ठाण्यात गुन्हा दाखल करण्यात आला आहे. रज्जाक जग्गू सय्यद,फिरोज उर्फ युसूफ अली सय्यद,सलीम विजू सय्यद,सिकंदर रज्जाक सय्यद व समाधान आहिरे (रा.मायको हॉस्पिटलमागे,कालीका नगर) अशी संशयीतांची नावे आहेत. याप्रकरणी सोनू अशोक शर्मा (२५ रा.मायको हॉस्पिटल मागे,दिंडोरीरोड) या युवकाने तक्रार दाखल केली आहे. १९ जुलै रोजी संशयीतांचे टोळके परिसरात राहणारे निलेश रावळ यास घरासमोर मारहाण करीत होते. या घटनेची माहिती शर्मा यांनी पोलीसांना कळविली होती. याचा राग मनात धरून संशयीतांनी नुकतीच शर्मा यांना मारहाण केली. बंद दरवाजावर लाथा मारून घरात अनधिकृतपणे प्रवेश करून शर्मा यांना लाथाबुक्यांनी मारहाण केली. यावेळी फिरोज सय्यद याने फायटरने मारहाण केल्याने शर्मा जखमी झाले असून अधिक तपास सहाय्यक निरीक्षक शिंदे करीत आहेत.
………
मार्केट यार्डातून पिकअप पळविली
नाशिक : अल्पावधीसाठी विश्वासाने दिलेले पिकअप वाहन एकाने पळवून नेल्याची घटना नुकतीच घडली. याप्रकरणी सिन्नर तालूक्यातील एकाविरूध्द पंचवटी पोलीस ठाण्यात गुन्हा दाखल करण्यात आला आहे. दत्तू जाधव (रा.पांगरी ता.सिन्नर) असे पिकअप पळवून नेणा-या संशयीताचे नाव आहे. याप्रकरणी वाल्मिक भिकाजी आघाव (रा.भुसे ता. निफाड) यांनी तक्रार दाखल केली आहे. आघाव बुधवारी (दि.९) शेती माल घेवून दिंडोरीरोडवरील मार्केट यार्डात आले होते. लिलाव आटोपून ते हॉटेल तुळजा भवानी जवळ पिकअप (एमएच १२ एफडी २८४१) पार्क करून थांबले असता संशयीत परिचीतााने त्यांना गाठले. यावेळी अल्पावधीसाठी पिकअप या मालवाहू वाहनाची मागणी केल्याने आघाव यांनी त्यास विश्वासाने चावी दिली असता संशयीताने वाहन घेवून पोबारा केला. अधिक तपास हवालदार मिसाळ करीत आहेत.
…….
घरातून लॅपटॉप चोरी
नाशिक : उघड्या घरात प्रवेश करून चोरट्यांनी लॅपटॉप चोरून नेल्याची घटना गुरूद्वारारोड भागात घडली. याप्रकरणी मुंबईनाका पोलीस ठाण्यात गुन्हा दाखल करण्यात आला आहे. शेखर हनुमंत पाटील (रा.अशोका गार्डन सोसा.गुरूद्वारारोड) यांनी याप्रकरणी तक्रार दाखल केली आहे. पाटील कुटूंबिय २९ नोव्हेंबर रोजी सकाळच्या सुमारास आपल्या घरात व्यस्त असतांना ही घटना घडली. अज्ञात चोरट्यांने उघड्या घरात प्रवेश करून हॉलमधील स्टडी टेबलावर ठेवलेला डेल कंपनीचा लॅपटॉप चोरून नेला. अधिक तपास हवालदार अहिरे करीत आहेत.
…
सराईत भावांनी दोघा मित्रांना भेसकले
नाशिक : पोलीसांचे खबरे असल्याच्या संशयातून सराईत गुन्हेगार असलेल्या दोघा भावांनी गप्पा मारत उभे असलेल्या मित्रांना बेदम मारहाण करीत धारदार शस्त्राने भोसकल्याची घटना चुंचाळे शिवारात घडली. याप्रकरणी अंबड पोलीस ठाण्यात गुन्हा दाखल करण्यात आला आहे. उध्दव उर्फ टकल्या अशोक राजगिरे व ऋषीकेश अशोक राजगिरे अशी पोलीस रेकॉर्डवरील गुन्हेगारांची नावे आहेत. याप्रकरणी बंटी जनार्दन लोंढे (२८ रा.घरकुल योजना,चुंचाळे) यांनी तक्रार दाखल केली आहे. लोंढे व त्याचा मित्र गुरूवारी (दि.१०) रात्री घर परिसरात गप्पा मारीत असतांना दोघा सराईतांसह त्यांच्या दोन साथीदारांनी त्यांना गाठले. तुम्ही पोलीसांना आमची माहिती देता या कारणावरून वाद घालत टोळक्याने दोघा मित्रांनी बेदम मारहाण केली. यावेळी टकल्या राजगिरे याने खिशातील धारदार शस्त्राने दोघा मित्रांवर वार केले. अधिक तपास हवालदार चव्हाण करीत आहेत.
……
चक्कर येवून पडल्याने वृध्दाचा मृत्यु
नाशिक : राहते घरात चक्कर येवून पडल्याने ७१ वर्षीय वृध्दाचा मृत्यु झाला. ही घटना मखमलाबाद येथे घडली. याप्रकरणी पंचवटी पोलीस ठाण्यात मृत्युची नोंद करण्यात आली आहे. सुभाष रामभाऊ लष्करे (रा.राधाकुंज साई कॉम्प्लेक्स समोर) असे मृत वृध्दाचे नाव आहे. सुभाष लष्करे गुरूवारी (दि.१०) रात्री आपल्या राहत्या घरात चक्कर येवून पडले होते. या घटनेत त्यांच्या डोक्यास मार लागल्याने कुटूंबियांनी त्यांना तात्काळ जिल्हा रूग्णालयात दाखल केले असता उपचार सुरू असतांना त्यांचा मृत्यु झाला. अधिक तपास हवालदार पाटील करीत आहेत.
