नाशिक : घराचा दरवाजा उघडा असल्याची संधी साधत रोकडसह मोबाईलवर डल्ला मारणा-या मुंबईच्या चोरट्यास पोलीसांनी बेड्या ठोकल्या. घरमालकाच्या खिशातील रोकड काढतांना संशयीत कुटूंबियांच्या हाती लागला असून त्यास पोलीसांच्या स्वाधिन करण्यात आले आहे. ही घटना गंजमाळ परिसरात घडली. याप्रकरणी भद्रकाली पोलीस ठाण्यात चोरीचा गुन्हा दाखल करण्यात आला आहे.
आकाश दिनकर ताचे (२३ रा.मुंबई) असे अटक केलेल्या संशयीताचे नाव असून तो सराईत गुन्हेगार आहे. याप्रकरणी मकसुद शेख मोहम्मद (रा.रजा मज्जिद जावळ,गंजमाळ) यांनी याप्रकरणी तक्रार दाखल केले आहे. मोहम्मद कुटूंबिय मंगळवारी (दि.१९) दुपारी आपल्या कामात व्यस्त असतांना ही घटना घडली. दरवाजा उघडा असल्याची संधी साधत संशयीताने घरात प्रवेश केला. यावेळी त्याने मांडणीवर चार्जिंगला लावलेला मोबाईल काढला त्यानंतर टांगलेल्या पॅन्टमधील तीन हजाराची रोकड रोकड काढीत असतांना तो मोहम्मद कुटूंबियांच्या हाती लागला. कुटूंबियांनी त्यास चोप देत पोलीसांच्या स्वाधिन केले असून अधिक तपास हवालदार वाघ करीत आहेत.
……
आडगावला भरदिवसा घरफोडी
नाशिक : कुटूंबिय कार्यक्रमासाठी घराबाहेर पडल्याची संधी साधत चोरट्यांनी घरफोडी करून ४५ हजाराचा ऐवज चोरून नेला. त्यात रोकडसह सोन्याचांदीच्या दागिण्यांचा समावेश आहे. ही घटना नांदूर लिंक रोड भागात घडली. याप्रकरणी आडगाव पोलीसात गुन्हा दाखल करण्यात आला आहे.
सुनिल सुखदेव नन्नावरे (रा.ब्रम्हगिरी सोसा.नांदूर लिंकरोड,जुने आडगाव पोलीस ठाण्याजवळ) यांनी याप्रकरणी तक्रार दाखल केली आहे. नन्नावरे कुटुंबिय सोमवारी (दि.१८) सकाळी नातेवाईकाच्या साखरपुड्यासाठी सिडको भागात गेले असता ही घटना घडली. कुटूंबिय कार्यक्रमास गेल्याची संधी साधत अज्ञात चोरट्यांनी त्यांच्या बंद घराचे कुलूप तोडून कपाटातील सात हजाराची रोकड आणि सोन्याचांदीचे दागिणे असा सुमारे ४५ हजाराचा ऐवज चोरून नेला. अधिक तपास उपनिरीक्षक जाधव करीत आहेत.
