नाशिक – गंगापूररोड भागात मोकळया मैदानात पार्क केलेले सफारी वाहन चोरीला

सफारीची चोरी
नाशिक : मोकळया मैदानात पार्क केलेले सफारी वाहन चोरट्यांनी चोरून नेल्याची घटना गंगापूररोड भागात घडली. याप्रकरणी गंगापूर पोलीस ठाण्यात वाहनचोरीचा गुन्हा दाखल करण्यात आला आहे. पुंडलिक आनंदराव पाटील (रा.श्रमीक सोसा.मानिकनगर) यांनी याप्रकरणी तक्रार दाखल केली आहे. पाटील यांची सुमारे साडे तीन लाख रूपये किमतीची सफारी (एमएच ४१ एजे ९६९०) मंगळवारी (दि.२३) रात्री त्यांच्या सोसायटी शेजारील फोकस क्लासेसच्या जवळील मोकळया मैदानात पार्क केलेली असतांना चोरट्यांनी चोरून नेली. अधिक तपास भूमकर करीत आहेत.

………….

दोघा मित्रांना मारहाण
नाशिक : शिवीगाळ करीत असल्याचा जाब विचारल्याने संतप्त दुकलीने दोघा मित्रांना बेदम मारहाण केल्याची घटना शालिमार परिसरात घडली. या मारहाणीत लाकडी बांबूचा वापर करण्यात आल्याने १७ वर्षीय युवक जखमी झाला असून याप्रकरणी भद्रकाली पोलीस ठाण्यात गुन्हा दाखल करण्यात आला आहे.
सागर साठे व नावेद उर्फ नाना शेख अशी मारहाण करणा-या संशयीतांची नावे आहेत. याप्रकरणी अमोल गौतम गायकवाड (१७ रा.भिमवाडी,गंजमाळ) या युवकाने तक्रार दाखल केली आहे. गायकवाड गेल्या शनिवारी (दि.२०) सायंकाळच्या सुमारास मित्र प्रेम याच्या समवेत शालिमार भागातील संदर्भ सेवा रूग्णालया समोरून पायी जात असतांना ही घटना घडली. वाटेत भेटलेल्या संशयीत दुकलीने कुठलेही कारण नसतांना दोघा मित्रांना शिवीगाळ केली. यावेळी गायकवाड याने जाब विचारला असता एकाने मित्र प्रेम यास लाथाबुक्यांनी तर दुस-याने गायकवाड यास लाकडी बांबूने बेदम मारहाण केली. या घटनेत गायकवाड जखमी झाला असून अधिक तपास पोलीस नाईक गवारे करीत आहेत.

……

उघड्या घरातून रोकडसह मोबाईलची चोरी
नाशिक : तिघे रूम पार्टनर दरवाजा उघडा ठेवून झोपी गेल्याची संधी साधत चोरट्यांनी घरात घुसून रोकडसह मोबाईल आणि घड्याळ चोरून नेल्याची घटना जूना गंगापूर नाका भागात घडली. याप्रकरणी सरकारवाडा पोलीस ठाण्यात चोरीचा गुन्हा दाखल करण्यात आला आहे. बाळकृष्ण सुखदेव मिसाळ (२४ रा.वैशाली बिल्डींग,जुना गंगापूर नाका) या युवकाने याप्रकरणी तक्रार दाखल केली आहे. बाळकृष्ण मिसाळ गंगापूर नाका भागातील वैशाली बिल्डींगमध्ये पार्टनरशिपमध्ये राहतात. बुधवारी (दि.२४) रात्री तिघे पार्टनर आपल्या रूममध्ये झोपलेले असतांना ही घटना घडली. उकाड्यामुळे तिघे मित्र दरवाजा उघडा करून झोपलेले असल्याची संधी साधत अज्ञात चोरट्यांनी घरात शिरून ही चोरी केली. घरात शिरलेल्या चोरट्यांनी चार मोबाईल,घड्याळ आणि पाकिट असा सुमारे २६ हजाराचा ऐवज चोरून नेला. पाकिटात चार हजार ६०० रूपयांची रोकड होती. अधिक तपास पोलीस नाईक लोंढे करीत आहेत.