नाशिक – खिडकीचे गज कापतांना नागरीकांनी दोघा परप्रांतीयांना दिला चोप

चोरीच्या प्रयत्नात परप्रांतीय दुकली जेरबंद
नाशिक : दुकानात चोरी करण्याच्या उद्देशाने खिडकीचे गज कापतांना नागरीकांनी दोघा परप्रांतीय भामट्यांनी पकडून बेदम चोप दिल्याची घटना रेडक्रॉस भागात घडली. जागृत नागरीकांनी पकडलेल्या दुकलीस पोलीसांच्या स्वाधिन करण्यात आले असून याप्रकरणी सरकारवाडा पोलीस ठाण्यात गुन्हा दाखल करण्यात आला आहे.
विजेंद्रसिंग नन्हेसिंग (३५) व अरूणकुमार श्रीविरसिंग (१८ रा.रामनगर,उत्तरप्रदेश) अशी दुकान फोडण्याच्या प्रयत्नात पकडण्यात आलेल्या संशयीताची नावे आहेत. याप्रकरणी हिरावाडीरोड भागात राहणारे विनोदभाई यांनी तक्रार दाखल केली आहे. विनोदभाई यांचे रेडक्रॉस भागात दुकान आहे. रविवारी (दि.१४) संशयीत विनोद भाई यांच्या दुकानाच्या खिडकीचे गज कापतांना मिळून आले. परिसरातील जागृत नागरीकांच्या ही बाब लक्षात येताच व्यापा-यांनी एकत्रीत येत संशयीतांना पकडून बेदम चोप दिला. त्यानंतर दोघांना पोलीसांच्या स्वाधिन केले. अधिक तपास हवालदार शेळके करीत आहेत.

…..

चक्कर येवून पडल्याने एकाचा मृत्यु
नाशिक : चक्कर येवून पडल्याने ४३ वर्षीय व्यक्तीचा मृत्यु झाला. ही घटना उंटवाडीरोडवरील क्रांतीनगर भागात घडली. याप्रकरणी मुंबई नाका पोलीस ठाण्यात मृत्युची नोंद करण्यात आली आहे.
संजय गंगाधर हांडवे असे मृत व्यक्तीचे नाव आहे. हांडवे रविवारी (दि.१४) सकाळच्या सुमारास अचानक चक्कर येवून आपल्या घरात पडले होते. या घटनेत ते बेशुध्द झाल्याने कुटूंबियांनी त्यांना तात्काळ जिल्हारूग्णालयात दाखल केले असता वैद्यकीय सुत्रांनी मृत घोषीत केले. अधिक तपास हवालदार आडके करीत आहेत.

……

माडसांगवीत एकाची आत्महत्या
नाशिक : माडसांगवी ता.जि.नाशिक येथील ३८ वर्षीय व्यक्तीने आपल्या राहत्या घरी विषारी औषध सेवन करून आत्महत्या केली. सदर इसमाच्या आत्महत्येचे कारण समजू शकले नाही. याप्रकरणी आडगाव पोलीस ठाण्यात मृत्युची नोंद करण्यात आली आहे.
प्रमोद बाबुराव जाधव असे आत्महत्या करणा-या व्यक्तीचे नाव आहे. जाधव यांनी शनिवारी (दि.१३) सायंकाळच्या सुमारास आपल्या राहत्या घरी अज्ञात कारणातून विषारी औषध सेवन केले होते. ही बाब लक्षात येताच कुटूंबियांनी त्यांना तात्काळ जिल्हा रूग्णालयात दाखल केले असता रविवारी त्यांचा उपचारादरम्यान मृत्यु झाला. अधिक तपास हवालदार लोहकरे करीत आहेत.