नाशिक – क्रेडीट कार्ड अ‍ॅक्टीव्ह करण्याचे आमिष दाखवून परस्पर सव्वा दोन लाख रूपये लांबविले

क्रेडीट कार्ड धारकाचे सव्वा दोन लाख लांबविले
नाशिक : क्रेडीट कार्ड अ‍ॅक्टीव्ह करण्याचे आमिष दाखवून भामट्यांनी परस्पर सव्वा दोन लाख रूपये आॅनलाईन लांबविल्याचा प्रकार समोर आला आहे. याप्रकरणी सायबर पोलीस ठाण्यात फसवणुकीचा गुन्हा दाखल करण्यात आला आहे. सिरीवालायम मुरली मोहन (रा.बळी मंदिरासमोर आयोध्यानगर) यांनी याप्रकरणी तक्रार दाखल केली आहे. मोहन आरबीएल बँकेचे क्रेडिट कार्ड धारक असून १ मार्च रोजी त्यांच्याशी भामट्यांनी संपर्क साधला होता. आरबीएल बँकेतून बोलत असल्याचे सांगून कार्ड अ‍ॅक्टीव्ह करण्याचे आमिष दाखविले. यानंतर वारंवार संपर्क साधत क्रेडीट कार्डची गोपनिय माहिती मिळवित भामट्यांनी २ लाख २५ हजार रूपयांचा परस्पर व्यवहार केला. अधिक तपास वरिष्ठ निरीक्षक श्रीपाद परोपकारी करीत आहेत.

…….

फुलेनगरला पानटपरी फोडली
नाशिक : पानटपरी फोडून चोरट्यांनी रोकडसह वीडी सिगारेटची पाकिटे असा ४५ हजाराचा ऐवज चोरून नेला. ही घटना पेठरोडवरील घटना फुलेनगर भागात घडली. याप्रकरणी पंचवटी पोलीस ठाण्यात गुन्हा दाखल करण्यात आला आहे. बाळासाहेब लळुका वाघमारे (रा.ओमकार नगर,मखमलाबाद) यांनी तक्रार दाखल केली आहे. वाघमारे यांची फुलेनगर बस स्टॉप परिसरात दिनेश पानस्टॉल नावाचे दुकान आहे. गुरूवारी (दि.१८) रात्री अज्ञात चोरट्यांनी बंद पानस्टॉलचे कुलूप तोडून तसेच शटर उचकटून काऊंटर मधील रोकड आणि विडी सिगारेटची पाकिटे असा सुमारे ४२ हजार ९०० रूपयांचा ऐवज चोरून नेला. अधिक तपास जमादार मिसाळ करीत आहेत.

……
संतकबीरनगरला ५० हजाराची घरफोडी
नाशिक : संत कबीरनगर भागात झालेल्या घरफोडीत चोरट्यांनी ४८ हजाराच्या ऐवजावर डल्ला मारला. त्यात सोन्याचांदीच्या दागिण्यांसह रोकडचा समावेश आहे. याप्रकरणी गंगापूर पोलीस ठाण्यात गुन्हा दाखल करण्यात आला आहे. राहूल भगवान झनकर (रा.भोसला स्कूल मागे संतकबीरनगर) यांनी याप्रकरणी तक्रार दाखल केली आहे. १० ते १८ मार्च दरम्यान अज्ञात चोरट्यांनी बंद घराची कडी उघडून कपाटातील पाच हजार रूपये आणि सोन्याचांदीचे दागिणे असा सुमारे ४८ हजाराचा ऐवज चोरून नेला. अधिक तपास हवालदार बोळे करीत आहेत.