कॉलेजरोडवर भरधाव कारने धडक दिल्याने वृद्ध ठार
नाशिक – कॉलेजरोडवर भरधाव कारने धडक दिल्याने वसंत केशव महादेवकर (वय ८५, रा. चैतन्य नगर, गंगापूररोड) यांचा मृत्यु झाला. पोलिसांनी दिलेल्या माहितीनुसार, १७ नोव्हेंबर रोजी सायंकाळी महादेवकर हे परिसरात पायी रस्ता ओलांडत होते. यावेळी संशयित नितीन लोहिया यांच्या भरधाव कार क्र. (एमएच ४३, एएन २०७९) ने महादेवकर यांना धडक दिली. त्यामुळे डोक्यास मार लागून नाका, कानातून रक्त आले व त्यांचा मृत्यू झाला. याप्रकरणी गंगापूर पोलीस ठाण्यात नोंद करण्यात आली आहे. पोलीस उपनिरिक्षक डी. एल. माळी अधिक तपास करत आहे.
……..
३० हजार रुपये किमतीचा लॅपटॉप चोरी
नाशिक : कॅनडा कॉर्नर परिसरात राहत्या घरातून अज्ञात चोरट्याने लॅपटॉप चोरून नेल्याचा प्रकार घडला.याप्रकरणी सरकारवाडा पोलीस ठाण्यात गुन्हा दाखल करण्यात आला आहे. युवराज दीपक खैरनार (रा. कॅनडा कॉर्नर) याने फिर्याद दिली आहे. १२ नोव्हेंबर रोजी युवराज याने त्याचा ३० हजार रुपये किमतीचा लॅपटॉप घरात ठेवलेला होता. १३ नोव्हेंबरला शोध घेतला असता त्यास तो आढळून आला नाही. अज्ञात चोरट्याने लॅपटॉप चोरून नेला. याप्रकरणी सरकारवाडा पोलीस ठाण्यात गुन्हा दाखल करण्यात आला आहे. अधिक तपास हवालदार लांडे करत आहे.
………
अज्ञात चोरट्याने ही मोटारसायकल चोरून नेली
नाशिक -पंचवटीतील मालवीय चौक परिसरात मोटारसायकल चोरीला गेली.याप्रकरणी पंचवटी पोलीस ठाण्यात गुन्हा दाखल करण्यात आला आहे. प्रशांत अरुण चौधरी (रा. काठेगल्ली) याने फिर्याद दिली आहे. कल्पेश शांताराम कर्डिले यांच्या मालकीची मोटारसायकल क्र. (एमएच १५ एई ४४७८) ही फिर्यादी प्रशांत चौधरी याच्या ताब्यात होती. ११ नोव्हेंबर रोजी प्रशांतने ही मोटारसायकल मालवीय चौक येथे उभी केली होती. यावेळी अज्ञात चोरट्याने ही मोटारसायकल चोरून नेली.
………
महामार्ग बस स्थानकात दोघांचे मोबाईल लंपास
नाशिक – महामार्ग बस स्थानक परिसरातून दोघा जणांचे मोबाइल अज्ञात चोरट्याने चोरून नेल्याचा प्रकार रविवारी घडला. या चोरी प्रकरणी मुंबई नाका पोलीस ठाण्यात गुन्हा दाखल करण्यात आला आहे. ईश्वर बाळू आहिरे (रा. शिवाजी चौक, नवीन नाशिक) यांनी फिर्याद दिली आहे. आहिरे हे बहिणीला सोडण्यासाठी महामार्ग बस स्थानकात गेले होते. त्यावेळी आहिरे यांच्यासह अखिलेश चौबे यांचा मोबाइल अज्ञात चोरट्याने चोरून नेला. हवालदार शिंदे तपास करत आहे.
