नाशिक – कृष्णनगर भागात डॉक्टरकडून रूग्ण महिलेचा विनयभंग, गुन्हा दाखल

डॉक्टरकडून रूग्ण महिलेचा विनयभंग
नाशिक : आजाराची तपासणी करण्याच्या बहाण्याने खासगी डॉक्टरने एका रूग्ण महिलेचा विनयभंग केल्याची घटना कृष्णनगर भागात घडली. याप्रकरणी पंचवटी पोलीस ठाण्यात विनयभंगाचा गुन्हा दाखल करण्यात आला आहे. डॉ.सुनिल जी.चव्हाण असे संशयीत डॉक्टरचे नाव असून त्याचा कृष्णनगर येथे सुनिल.जी.चव्हाण नावाचा खासगी दवाखाना आहे. रविवारी (दि.२८) सायंकाळच्या सुमारास परिसरातील महिलेची प्रकृर्तीत बिघाड झाल्याने ती आपल्या पतीस सोबत घेवून चव्हाण डॉक्टरच्या क्लिनीकमध्ये गेली होती. यावेळी त्याने तपासणीचा बहाणा करून महिलेचा विनयभंग केला. अधिक तपास उपनिरीक्षक कासर्ले करीत आहेत.

….

घरफोडीत ५० हजाराची चोरी
नाशिक : भरदिवसा झालेल्या घरफोडीत चोरट्यांनी ५० हजाराच्या रोकडवर डल्ला मारला. ही घटना अशोकमार्ग परिसरात घडली. कुटूंबिय बाहेरगावी गेल्याची संधी साधत चोरट्यांनी ही घरफोडी केली. याप्रकरणी मुंबईनाका पोलीस ठाण्यात गुन्हा दाखल करण्यात आला आहे.
अब्बास यासिन कादरी (रा.अमिन टॉवर,जलसा हॉटेल मागे) यांनी याप्रकरणी तक्रार दाखल केली आहे. कादरी कुटूंबिय रविवारी (दि.२८) सकाळी संगमनेर येथील दवाखान्यात नियमीत तपासणीसाठी गेले होते. ही संधी साधत अज्ञात चोरट्यांनी त्यांच्या बंद घराचा कडी कोयंडा तोडून बेडरूममधील कपाटातून ५० हजाराची रोकड चोरून नेली. अधिक तपास पोलीस नाईक जावेद शेख करीत आहेत.

…..

टोळक्याकडून पिकअप चालकास मारहाण
नाशिक : धनादेश रिटर्न प्रकरणी कोर्टात केस व पोलीसात तक्रार दाखल केल्याच्या कारणातून टोळक्याने पिकअप चालकास बेदम मारहाण केल्याची घटना चेहडी जकात नाका भागात घडली. या घटनेत एकाने धारदार शस्त्राने तर दुस-याने लोखंडी रॉडने मारहाण केल्याने तरूण जखमी झाला असून, याप्रकरणी नाशिकरोड पोलीस ठाण्यात गुन्हा दाखल करण्यात आला आहे.
भगवान चंद्रकांत धात्रक,उत्तम चंद्रभान धात्रक (रा.हिंगणवेढे ता.नाशिक) व त्यांचे दोन साथीदार अशी तरूणास मारहाण करणा-या संशयीतांची नावे आहेत. याप्रकरणी योगेश पोपट धात्रक (२४ रा.हिंगणवेढे ता.नाशिक) याने तक्रार दाखल केली आहे. योगेश धात्रक रविवारी (दि.२८) पिकअप वाहनात ऊसाच्या बांड्या भरून अंकुश गवळी यांच्या गोठ्यात खाली करण्यासाठी जात असतांना ही घटना घडली. चेहडी जकात नाका येथे चौघांच्या टोळक्याने पिकअप अडवून ही मारहाण केली. संशयीत धात्रक बंधूनी चेक बाऊन्सची केस कोर्टात का टाकली तसेच पोलीसात तक्रार का दाखल केली या कारणातून वाद घालत एकाने डोक्यावर धारदार शस्त्राने वार केला तर दुस-याने लोखंडी रॉड मारल्याने योगेश जखमी झाला असून संशयीतांच्या अन्य अनोळखी साथीदारांनीही लाथाबुक्यांनी मारहाण केल्याचे त्याने तक्रारीत म्हटले आहे. अधिक तपास हवालदार गांगुर्डे करीत आहेत.

…..

दोन दुचाकींची चोरी
नाशिक : शहरात मोटारसायकल चोरीचे सत्र सुरूच असून नुकत्याच दोन दुचाकी चोरट्यांनी चोरून नेल्या. याप्रकरणी नाशिकरोड आणि अंबड पोलीस ठाण्यात गुन्हा दाखल करण्यात आला आहे. जेलरोड भागातील अनिल लिलाचंद भावसार (रा.प्रथमेश अपा.त्रिवेणी पार्क) यांची अ‍ॅक्टीव्हा एमएच १५ ईएम ३४७७ गेल्या शुक्रवारी (दि.२६) रात्री त्यांच्या सोसायटीच्या पार्किंगमध्ये लावलेली असतांना चोरट्यांनी चोरून नेली. याप्रकरणी नाशिकरोड पोलीस ठाण्यात गुन्हा दाखल करण्यात आला असून अधिक तपास हवालदार वडघुले करीत आहेत. दुसरी घटना सिडकोत घडली. पंडीत नगर भागात राहमारे मंगेश मधुकर शिंदे यांची शाईन एमएच १५ जीएस ७७४८ दुचाकी १३ फेब्रुवारी रोजी रात्री त्यांच्या घरासमोर पार्क केलेली असतांना चोरट्यांनी पळवून नेली. याप्रकरणी अंबड पोलीस ठाण्यात गुन्हा दाखल करण्यात आला असून अधिक तपास हवालदार गारले करीत आहेत.

….

चक्कर येवून पडल्याने एकाचा मृत्यु
नाशिक : चक्कर येवून पडल्याने ५५ वर्षीय इसमाचा मृत्यु झाला. ही घटना देवळाली गावात घडली. याप्रकरणी उपनगर पोलीस ठाण्यात मृत्युची नोंद करण्यात आली आहे. रामा संतान निशद (रा.सुंदरनगर) असे मृत व्यक्तीचे नाव आहे. सोमवारी (दि.१) सायंकाळच्या सुमारास ही घटना घडली. रामा निशद हे आपल्या राहत्या घरी चक्कर येवून पडले होते. मित्र राजू काळे यांनी त्यांना बेशुध्द अवस्थेत जिल्हारूग्णालयात दाखल केले असता उपचारापूर्वी वैद्यकीय सुत्रांनी त्यांना मृत घोषीत केले. अधिक तपास हवालदार लोहकरे करीत आहेत.

….

संतकबीरनगरला महिलेची आत्महत्या
नाशिक : संतकबीरनगर येथील कोंबडचाळीत राहणा-या २४ वर्षी महिलेने गळफास लावून आत्महत्या केली. सदर महिलेच्या आत्महत्येचे कारण समजू शकले नाही. याप्रकरणी गंगापूर पोलीस ठाण्यात मृत्युची नोंद करण्यात आली आहे.
मोहिनी उमेश लहांगे (रा.भोसला स्कूल समोर) असे मृत महिलेचे नाव आहे. मोहिनी लहांगे या महिलेने सोमवारी (दि.१) सायंकाळच्या सुमारास अज्ञात कारणातून आपल्या राहत्या घरात लोखंडी रॉडला ओढणी बांधून गळफास लावून घेतला होता. त्यात तिचा मृत्यु झाला. विजय भगरे यांनी दिलेल्या खबरीवरून गंगापूर पोलीसात मृत्युची नोंद करण्यात आली असून अधिक तपास पोलीस नाईक भडिंगे करीत आहेत.

…..

सोप्यावरून पडल्याने वृध्दाचा मृत्यु
नाशिक : सोप्यावरून पडल्याने वृध्दाचा मृत्यु झाला. ही घटना सिडकोतील उत्तमनगर भागात घडली. याप्रकरणी अंबड पोलीस ठाण्यात मृत्युची नोंद करण्यात आली आहे.
निशीकांत गोपाळ कुलकर्णी (७५ रा.गुप्तगंगा रो हाऊस,भाद्रपद सेक्टर) असे मृत वृध्दाचे नाव आहे. निशीकांत कुलकर्णी १० फेब्रुवारी रोजी आपल्या घरातील सोप्यावर बसलेले असतांना ही घटना घडली. अचानक सोप्यावरून पडल्याने त्यांच्या कमरेस मार लागला होता. कुटूंबियांनी त्यांना तात्काळ जिल्हारूग्णालयात दाखल केले होते. उपचार सुरू असतांना सोमवारी (दि.१) त्यांचा मृत्यु झाला. अधिक तपास पोलीस नाईक परदेशी करीत आहेत.