कारखान्यातून अ‍ॅल्युमिनीयम पाईप चोरी
नाशिक : बंद कारखान्यात शिरून चोरट्यांनी अ‍ॅल्युमिनीयम पाईप चोरून नेले. ही घटना औद्योगीक वसाहतीतील राजेंद्र इंडस्ट्रीज या कारखान्यात घडली. याप्रकरणी सातपूर पोलीस ठाण्यात गुन्हा दाखल करण्यात आला आहे. उमेश प्रभाकर ठाकरे (रा.कामटवाडे) यांनी याप्रकरणी तक्रार दाखल केली आहे. ठाकरे यांचा एमआयडीसीतील एच २२ या भूखंडावर राजेंद्र इंडस्ट्रीज या नावाचा कारखाना आहे. गेल्या रविवारी (दि.७) कारखाना बंद असतांना अज्ञात चोरट्यांनी कंपनीच्या शेडच्या लोखंडी पत्र्याचे हुक काढून कारखान्यात प्रवेश केला. यानंतर स्टोअरचे कुलूप तोडून सिन्नर येथील अ‍ॅपेक्स कंपनीकडून जॉबवर्क साठी आलेले सुमारे ३० हजार रूपये किमतीचे २१ अ‍ॅल्युमिनीयम पाईप चोरून नेले.अधिक तपास हवालदार शिंदे करीत आहेत.
….
चिमुरडीवर बलात्काराचा प्रयत्न
नाशिक : पाच वर्षीय बालिकेवर २० वर्षीय नराधमाने बलात्काराचा प्रयत्न केल्याची घटना सिडकोतील पाटील नगर भागात उघडकीस आली. याप्रकरणी अंबड पोलीस ठाण्यात गुन्हा दाखल करण्यात आला असून संशयीतास पोलीसांनी बेड्या ठोकल्या. कृष्णा उर्फ बाळा अशोक शिंदे (रा.सरस्वतीचौक) असे संशयीताचे नाव आहे. परिसरात खेळणा-या चिमुरडीस कश्याचे तरी आमिष दाखवून संशयीताने आपल्या घरात नेले. यावेळी त्याने बलात्कार करण्याचा प्रयत्न केला. मात्र वेळीच मुलीच्या आईने शोधाशोध केल्याने अनर्थ टळला. याप्रकरणी अंबड पोलीस ठाण्यात बलात्कार आणि बाल लैंगिक अत्याचार संरक्षण (पोस्को) कायद्यान्वये गुह्याची नोंद करण्यात आली असून संशयीतास अटक करण्यात आली आहे. अधिक तपास उपनिरीक्षक गवांदे करीत आहेत.
…..
