महिलांनी पर्स लांबविली
नाशिक : खरेदी करणा-या महिलेच्या पिशवीतील पर्स भामट्या महिलांनी हातोहात लांबविल्याची घटना वर्दळीच्या कानडे मारूती लेन भागात घडली. पर्स मध्ये मोबाईलसह रोकड आणि महत्वाची कागदपत्र होती. याप्रकरणी भद्रकाली पोलीस ठाण्यात चोरीचा गुन्हा दाखल करण्यात आला आहे.
सविता अनिल सुर्यवंशी (रा.शिवरामनगर,टाकळीरोड) यांनी याप्रकरणी तक्रार दाखल केली आहे. सुर्यवंशी या शुक्रवारी (दि.२९) खरेदीसाठी मेनरोड भागात आल्या होत्या. सायंकाळच्या सुमारास त्या कानडे मारूती लेन भागातील महालक्ष्मी दुकानासमोर एका हातगाड्यावर खरेदी करीत असतांना ही घटना घडली. अज्ञात दोन तीन अनोळखी महिलांनी बाजारपेठेतील गर्दीची संधी साधत त्यांच्या पिशवीतील पर्स चोरून नेली. पर्स मध्ये ७०० रूपयांची रोकड, मोबाईल व महात्वाची कागदपत्र होती. अधिक तपास हवालदार पाळदे करीत आहेत.
……
मखमलाबादरोडवरील गुलमोहोरनगर येथे वृध्द महिलेचे मंगळसुत्र खेचले
नाशिक : रस्त्याने पायी जाणा-या वृध्द महिलेच्या गळयातील मंगळसुत्र दुचाकीस्वार भामट्यांनी ओरबाडून नेल्याची घटना मखमलाबादरोडवरील गुलमोहोरनगर भागात घडली. याप्रकरणी म्हसरूळ पोलीस ठाण्यात जबरीचोरीचा गुन्हा दाखल करण्यात आला आहे. सुनंदा लक्ष्मण घुमरे (७० रा.मार्वल बिल्डींग,राऊत हॉस्पिटल जवळ,गुलमोहरनगर म.बादरोड) यांनी याप्रकरणी तक्रार दाखल केली आहे. घुमरे या शुक्रवारी (दि.२९) सायंकाळच्या सुमारास परिसरात फेरफटका मारण्यासाठी घराबाहेर पडल्या होत्या. फेरफटका मारून घराकडे परतत असतांना ही घटना घडली. मार्वल बिल्डींगच्या कॉर्नरवरून त्या पायी जात असतांना दुचाकीवर आलेल्या भामट्यांपैकी एकाने त्यांच्या गळय़ातील सुमारे ७० हजार रूपये किमतीचे मंगळसुत्र ओरबडून नेले. अधिक तपास उपनिरीक्षक चतुर करीत आहेत.
…….
