काठेगल्लीतून बुलेट चोरी
नाशिक : शहरात वाहन चोरीचे सत्र सुरूच असून, काठेगल्लीत घरासमोर पार्क केलेली बुलेट चोरट्यांनी चोरून नेली. याप्रकरणी भद्रकाली पोलीस ठाण्यात गुन्हा दाखल करण्यात आला आहे.
सिद्धार्थ काशिनाथ निकम (रा. वनराज कॉलनी, काठेगल्ली) यांनी याप्रकरणी तक्रार दाखल केली आहे. निकम यांची बुलेट (एमएच १५, एफएच ७१६३) शुक्रवारी (दि.९) रात्री त्यांच्या बंगल्याच्या आवारात लावलेली असतांना चोरट्यांनी पळवून नेली. अधिक तपास पोलीस नाईक आहिरे करीत आहेत.
…..
शेजा-यांकडून दांम्पत्यास मारहाण
नाशिक : शिवीगाळ केल्याची कुरापत काढून शेजारी कुटूंबियांनी दांम्पत्यास बेदम मारहाण केल्याची घटना वडाळा पाथर्डी मार्गावरील पांडवनगरी येथे घडली. याप्रकरणी इंदिरानगर पोलीस ठाण्यात मारहाणीचा गुन्हा दाखल करण्यात आला आहे. सुनिता वाघ,स्वप्नील वाघ व रमेश वाघ अशी दांम्पत्यास मारहाण करणा-या संशयीतांची नावे आहेत. याप्रकरणी संध्या सिताराम गोसावी (रा.भरत सोसा.पांडवनगरी) यांनी याप्रकरणी तक्रार दाखल केली आहे. वाघ आणि गोसावी कुटूंबिय एकास सोसायटीतील शेजारी असून शनिवारी (दि.१०) दोन्ही कुटूंबियांत तुंबळ हाणामारी झाली. गोसावी कुटूंबिय नेहमी शिवीगाळ करतात या कारणातून वाघ कुटूबियांनी वाद घालत गोसावी दांम्पत्यास बेदम मारहाण केली. या घटनेत संशयीत स्वप्नील वाघ याने महिलेच्या नाकावर लोखंडी रॉड मारल्याने ती जखमी झाली असून अधिक तपास जमादार पाळदे करीत आहेत.
