इंडस्ट्रीयल ऑक्सिजनची चोरी
नाशिक : इंडस्ट्रीयल ऑक्सिजनचे तीन सिलेंडर चोरट्यांनी चोरून नेल्याची घटना शिंगाडा तलाव भागात घडली. याप्रकरणी मुंबईनाका पोलीस ठाण्यात चोरीचा गुन्हा दाखल करण्यात आला आहे. प्रेरणा विजय गायकवाड (रा.बॉईज टाऊन रोड,शरणपूररोड) यांनी याप्रकरणी तक्रार दाखल केली आहे. गायकवाड यांच्या मालकीचे सुमारे पंधरा हजार रूपये किमतीचे जुने वापरते इंडस्ट्रीयल ऑक्सिजन सिलेंडर गेल्या शुक्रवारी (दि.१२) शिंगाडा तलाव येथील अग्निशमन केंद्रासमोर ठेवलेले असतांना चोरट्यांनी चोरून नेले. अधिक तपास पोलीस नाईक सांगळे करीत आहेत.
….
किरकोळ कारणातून एकास मारहाण
नाशिक : खून्नसने पाहतो या कारणातून तरूणास एकाने बेदम मारहाण करीत जखमी केल्याची घटना पेठरोडवरील आरटीओ कार्यालयासमोर झाली. याप्रकरणी म्हसरूळ पोलीस ठाण्यात गुन्हा दाखल करण्यात आला आहे. गौतम बाजीराव मन्हेरे (रा.अश्वमेधनगर) असे मारहाण करणा-या संशयीताचे नाव आहे. याप्रकरणी अनिल केरवा धोत्रे (२४ रा.अश्वमेधनगर) या युवकाने तक्रार दाखल केली आहे. अनिल धोत्रे रविवारी (दि.१४) रात्री अश्वमेधनगर भागात उभा असतांना संशयीताने त्यास गाठले. यावेळी संशयीताने माझ्याकडे खुन्नसने का पाहतो अशी विचारणा करीत शिवीगाळ केली. तुझा बेत पाहतो असा दम भरत संशयीताने लोखंडी रॉड मारल्याने धोत्रे जखमी झाला असून अधिक तपास हवालदार पवार करीत आहेत.
….
घरफोडीत टीव्हीची चोरी
नाशिक : घरफोडीत चोरट्यानी एलईडी टीव्हीसह तांब्याचा हंडा आणि पितळी समई चोरून नेली. ही घटना मखमलाबाद रोडवरील गामणे मळयात घडली. याप्रकरणी म्हसरूळ पोलीस ठाण्यात गुन्हा दाखल करण्यात आला आहे. गजानन सुरेश आहिरे (२६ रा. मनपा कॉलनी,स्वामी विवेकानंद नगर) यांनी याप्रकरणी तक्रार दाखल केली आहे. आहिरे कुटूंबिय ५ फेब्रुवारी रोजी बाहेरगावी गेले असता ही घटना घडली. अज्ञात चोरट्यांनी बंद घराचे कुलूप तोडून हॉलमधील सोनी कंपनीचा टीव्ही आणि बेडरूममधील हांडा व समई असा सुमारे ३० हजाराचा ऐवज चोरून नेला. अधिक तपास उपनिरीक्षक माळी करीत आहेत.
…..
