नाशिक : रस्ता ओलांडत असतांना भरधाव अज्ञात वाहनाने दिलेल्या धडकेत चहा विक्रेता ठार झाला. हा अपघात रेस्ट कॅम्प रोड भागात झाला. याप्रकरणी देवळाली कॅम्प पोलीस ठाण्यात अपघाताची नोंद करण्यात आली आहे.
सायमन अरोग्य स्वामी (४५ रा.रेस्ट कॅम्प रोड,केंद्रीय विद्यालयाजवळ,दे.कॅम्प) असे मृत चहा विक्रेत्याचे नाव आहे. स्वामी बुधवारी (दि.४) सायंकाळच्या सुमारास चहाची आॅर्डर देण्यासाठी परिसरात गेला असता ही घटना घडली. ग्राहकांना चहा देवून आपल्या टपरीकडे परतत असतांना रेस्ट कॅम्प रोडवरील भाजी मार्केट समोरील रेणूका देवी मंदिर परिसरात तो रस्ता ओलांडत असतांना हा अपघात झाला. भगूर कडून देवळाली कॅम्पच्या दिशने भरधाव जाणा-या अज्ञात वाहनाने त्यास धडक दिली या अपघातात स्वामी गंभीर जखमी झाले होते. भाऊ लॉरेन्स स्वामी यांनी त्यांना तात्काळ सुमन हॉस्पिटल येथे दाखल केले असता गुरूवारी (दि.५) दुपारी उपचार सुरू असतांना त्याचा मृत्यु झाला. अधिक तपास हवालदार शेवाळे करीत आहेत.
