नाशिक – नाशिक जिल्ह्यात १ ऑगस्टपासून मॉल सुरू होणार आहेत. मात्र, त्यासाठी काही अटी घालून देण्यात आल्या आहेत. यासंदर्भातील माहिती जिल्हाधिकारी सूरज मांढरे यांनी दिली आहे.
मांढरे यांनी सांगितले आहे की, नाशिक जिल्ह्यात कोरोनाची स्थिती बऱ्यापैकी नियंत्रणात आहे. परंतु, अद्यापही धोका पूर्ण टळलेला नाही त्यामुळे काळजी घेणे आवश्यकच आहे. पालकमंत्री, पोलीस आयुक्त, महापालिका आयुक्त तसेच विविध लोकप्रतिनिधींशी वेळोवेळी झालेल्या चर्चेनुसार नाशिक शहर, मालेगाव शहर व उर्वरित जिल्ह्यात नवे आदेश जारी करण्यात आले आहेत. सद्यस्थितीत ज्या पद्धतीने सर्व कामकाज सुरू आहे त्याच पद्धतीने सुरू राहील. फक्त त्यामध्ये मॉल व आउटडोअर अॅक्टिव्हिटीची भर पडेल, असे जिल्हाधिकाऱ्यांनी स्पष्ट केले आहे.
एकीकडे कोरोनाविषयक काळजी घेणे व दुसरीकडे अर्थचक्र सुरू ठेवणे याचा सुवर्णमध्य साधण्याचा प्रयत्न आपण वेळोवेळी करीत आहोत व त्यास योग्य यशदेखील मिळत आहे. सद्यस्थितीत जेवढी रुग्णसंख्या वाढते आहे साधारणपणे त्या प्रमाणात रुग्ण बरेही होत आहेत त्यामुळे परिस्थिती नियंत्रणात येत आहे. नागरिकांनी काळजी घेतल्यास व चांगल्या प्रकारे संयम पाळल्यास आगामी काळात आपण या आपत्तीतून पूर्णपणे बाहेर पडू याची मला खात्री आहे, असे मांढरे यांनी म्हटले आहे.
सातच्या आत कायम
अधिसूचनेत नमूद केल्याप्रमाणे कामकाजाची वेळ सकाळी ९ ते ७ या दरम्यान राहील. दुकानांच्या कामकाजाविषयक पूर्वीच्या अधिसूचनेतील निर्देश शासनाने कायम ठेवले असल्यामुळे सम-विषम ही पद्धतदेखील कायम राहील. तसेच स्थानिक परिस्थितीचा विचार करून स्थानिक पातळीवर घेतलेले निर्णयदेखील शासनाने कायम ठेवलेले असल्याने सायंकाळी ७ नंतर नाशिक शहरात लागू करण्यात आलेले संचारावरील निर्बंधदेखील तसेच कायम राहतील.
