अहमदाबाद – गुजरातमध्ये स्थानिक स्वराज्य संस्थांच्या निवडणुकीमुळे राजकीय वातावरण ढवळून निघाले आहे. त्यातही पंतप्रधान नरेंद्र मोदी यांचे भाऊ प्रल्हाद मोदी यांच्या मुलीला भाजपनं तिकीट नाकरल्यानं प्रल्हाद मोदींनी टीका केली आहे. प्रल्हाद मोदी यांची मुलाखत एका खासगी वाहिनीनं प्रसिद्ध केली आहे. त्यात भाजपच्या निर्णयावर त्यांनी नाराजी व्यक्त केली आहे.
पंतप्रधान नरेंद्र मोदी यांचा फोटो वापरून आमचा उदरनिर्वाह होत नाही. आम्ही सगळे मेहनत करतो, माझं किराणा मालाचं दुकान आहे, असं प्रल्हाद मोदींनी म्हटलं आहे. माझी मुलगी ओबीसींसाठी राखीव मतदारसंघातून निवडणूक लढवू इच्छिते. नरेंद्र मोदी यांनी १९७० साली घर सोडलं आणि देशाला आपलं कुटुंब बनवलं. त्यांचा जन्म आमच्या कुटुंबातला असला तरी ते भारतमातेचे पुत्र म्हणूनच वाटचाल करत आहेत. असं पाहिलं तर कोणीच निवडणूक लढवू शकणार नाही, असंही त्यांनी सांगितलं. आमच्या रेशनकार्डावरही नरेंद्र मोदी यांचं नाव नाही, मग ते आमच्या कुटुंबाचा भाग आहेत असं कसं म्हणता येईल. नियम बनवले असतील तर ते सर्वांनी पाळायला हवेत. सोनल मोदी यांनी कधी पंतप्रधानांच्या सरकारी निवासस्थानाला भेट दिली आहे का? हे तपासलं तर नातं किती घट्ट आहे, हे लक्षात येईल. अद्याप मी पंतप्रधानांच्या घराचं दार पाहिलं नाही तर ते माझ्या मुलांना कसं माहिती असले. ते आईला भेटतात मात्र इतर कुटुंबीयांना दूर ठेवतात, असा आरोपही त्यांनी केला आहे.
…यामुळं नाकारलं तिकीट
भाजपमध्ये नेत्यांचे नातेवाईक, महापालिकेत ३ वेळा कार्यकाळ पूर्ण करणारे आणि ६० पेक्षा अधिक वय असणार्यांना उमेदवारी न देण्याचे निकष लावले आहेत. त्यामुळे पंतप्रधानांची पुतणी सोनल मोदी यांना तिकीट नाकारण्यात आलं आहे. केंद्रीय गृहमंत्री अमित शहा यांचे चिरंजीव जय शहा यांचं क्रिकेटमध्ये कोणतंही योगदान नसताना त्यांना बीसीसीआयचं सचिवपद कसं दिलं जातं, असा सवालही प्रल्हाद मोदी यांनी केला आहे.
