नक्षलवाद्यांनी जवानांवर अचानक केला असा हल्ला

बिजापूर (छत्तीसगड) – जिल्ह्यात नक्षलवादी आणि सुरक्षा जवानांमध्ये मोठी चकमक झाली. यात पहिली गोळी चालवली गेली. तेव्हाच साऱ्यांना आश्चर्य वाटले. कारण जवान कधीच गावांवर गोळी चालवत नाहीत. तेवढ्यात डोंगरावरून जोरदार फायरिंग सुरू झाले. जवानांना काही समजण्यापूर्वीच नक्षलवादी त्यांच्यावर हावी झाले होते. त्यामुळेच जवानांना मोठे नुकसान भोगावे लागले.

केवळ जवानांनाच नाही तर नक्षलवाद्यांनाही मोठे नुकसान या चकमकीत भोगावे लागले. कमीत कमी १२ नक्षलवादी यात मारले गेले आणि तेवढेच गंभीर जखमीही आहेत. नक्षलवादी आपले नुकसान सहसा दाखवत नाही, त्यामुळे प्रत्यक्ष स्थिती कळू शकत नाही. मात्र आपल्या साथीदाऱ्यांचा मृतदेह उचलण्यासाठी नक्षलवादी ट्रॅक्टर घेऊन आल्याचे स्थानिकांनी आणि जवानांनी बघितले होते. 

बस्तरचे आयजी सुंदरराजन पी यांनी म्हटले आहे की, पिपल्स लिबरेशन गुरिल्ला आर्मी (पीएलजीए) बटालियन दहशतवाद निर्माण करण्याच्या मागे लागले आहेत. आणि जवान तेच रोखण्याच्या मागे लागले आहेत. कठीण भौगोलिक परिस्थिती व नक्षलवाद्यांचा भाग असूनही जवान आपल्या जीवाची पर्वा न करता नक्षलवाद्यांच्या भागात घुसून त्यांना आव्हान देत आहेत.

३ एप्रिलला बिजापूर व सुकमा या सीमावर्ती भागांमध्ये सर्चिंग झाले होते. जवानांनी गुंडम, टेकलागुडम, जोनागुडम, अलीगुडम या नक्षलवाद्यांचा ठिय्या असलेल्या भागांवर विशेष लक्ष दिले. नक्षलवाद्यांना त्यांच्या भागातून हाकलून लावण्याच्या तर्रेम येथील अलावा उसूर, पामेड, मिनपा, नरसापुरम आदी कँपमधून जवान पोहोचले होते. नक्षलवाद्यांचा सामना करताना त्यांना मोठ्या प्रमाणात नुकसान पोहोचविण्यात जवानांना यश आले आहे. जवान शहीद झाले, पण नक्षलवाद्यांसाठी जो परिसर सुरक्षित मानला जात होता तो आता पूर्णपणे ताब्यात घेण्यात आला आहे, हे अत्यंत महत्त्वाचे. या घटनेत २२ जवान शहीद झाले.

नक्षलवाद्यांचे षडयंत्र

सूत्रांनी दिलेल्या माहितीनुसार, नक्षलवाद्यांनी पूर्ण षडयंत्र रचून पहिलेच गाव रिकामे केले होते. त्यानंतर त्याठिकाणी दाखल झाले. गावातील घरांमध्ये गावकरी नाहीत तर नक्षलवादी लपले आहेत, याचा अंदाजच जवानांना आला नाही. जवान डोंगरावर गोळीबार करीत होते आणि नक्षलवादी गावात ठाण मांडून होते. त्यामुळे पहिली गोळी जंगलातून नव्हे तर गावातून चालली होती, हे सिद्ध झाले.