नाशिक – गुजरात सीमेनजिक दारुची अवैध वाहतूक होत असल्याची बाब पुन्हा एकदा समोर आली आहे. राज्य उत्पादन शुल्क विभागाच्या भरारी पथकाने हतगड परिसरात छापा टाकून दारु आणि वाहनासह तब्बल ११ लाख रुपयांचा मुद्देमाल जप्त केला आहे.
उत्पादन शुल्क विभागाने दिलेल्या माहितीनुसार, हतगड-अभोणा मार्गावर मद्याची अवैध वाहतूक सुरू असल्याची माहिती मिळाली. त्यानुसार विभागीय उपायुक्त अर्जुन ओहळ,अधिक्षक मनोहर अंचुळे आणि मुख्यालय उपअधिक्षक भुतकर यांच्या मार्गदर्शनाखाली प्रभारी निरीक्षक देवदत्त पोटे यांच्या पथकाने हतगड शिवारात सापळा लावला. अभोणा फाटा येथे पथकाने बोलेरो टेम्पो अडवून तपासणी केली असता त्यात टँगो या देशी दारूची १६२ खोकी आढळून आली. पथकाने दोघांना बेड्या ठोकत वाहनासह दारू असा सुारे ११ लाख ४ हजार ३५२ रूपये किमतीचा मुद्देमाल जप्त केला आहे. सुरगाणा येथील दोन जणांना अटकही केली आहे. त्यात अल्केश सुरेश एखंडे (२८ रा.धोडांबे – बोरगाव ता.सुरगाणा) व अनिल चंदर महाले (२० रा.गांधीनगर,सुरगाणा) यांचा समावेश आहे. संशयितांच्या अटकेने दारू तस्करांची मोठी टोळी उघडकीस येण्याची शक्यता सुत्रांनी वर्तविली आहे. ही कारवाई निरीक्षक देवदत्त पोटे यांच्या नेतृत्वाखाली दुय्यम निरीक्षक एस.एस.रावते जवान गोकुळ शिंदे,लोकेश गायकवाड,विठ्ठल हाके,भाऊसाहेब घुले,युवराज रतवेकर आदींच्या पथकाने केली.
