देशभक्तीपर चित्रपटांचा पहिलाच ऑनलाईन चित्रपट महोत्सव आजपासून

नवी दिल्ली – राष्ट्रीय चित्रपट विकास महामंडळ, एनएफडीसीने देशभक्तीपर  चित्रपटांचा पहिला वाहिला ऑनलाईन चित्रपट महोत्सव, आयोजित केला आहे. स्वातंत्र्यदिन उत्सव २०२० चा भाग असलेला हा महोत्सव, माहिती आणि प्रसारण मंत्रालयाअंतर्गत आयोजित करण्यात आला आहे. शुक्रवारपासून (७ ऑगस्ट) हा महोत्सव सुरु होईल. या महोत्सवात, भारतीय ऐतिहासिक चित्रपट, ज्यात देशाच्या स्वातंत्र्यलढ्यात गाजवलेल्या शौर्य आणि बलिदानाचे चित्रण असेल, असे चित्रपट निवडण्यात आले आहेत. देशविदेशातील भारतीयांच्या मनात राष्ट्रप्रेमाची भावना जागृत करण्यासाठी हा महोत्सव आयोजित करण्यात आला आहे.

समीक्षकांनी नावाजलेले, विविध भारतीय भाषांमधले चित्रपट, जसे, हिंदी,मराठी, तेलुगू,तमिळ, बंगाली, गुजराती आणि मल्याळम या महोत्सवादरम्यान दाखवले जाणार आहेत. राष्ट्रीय चित्रपट विकास महामंडळ, राष्ट्रीय चित्रपट संग्रहालय तसेच बालचित्रपट सोसायटीच्या संग्रहात असलेले चित्रपट या महोत्सवात दाखवले जाणार आहे. त्याशिवाय पहिल्यांदाच रिचर्ड अटेनबरो यांचा ‘गांधी’ हा नावाजलेला चित्रपट  ऑनलाईन उपलब्ध होणार आहे. तसेच मूकबधिर प्रेक्षकांना सुद्धा या चित्रपटाचा आस्वाद घेता येणार आहे.  माहिती आणि प्रसारण मंत्रालयाच्या वेबसाईटवर या चित्रपटाची लिंक असेल. तसंच पत्र सूचना कार्यालया आणि माय गोव्ह यांच्या सोशल मीडिया हँडल वर देखील या चित्रपटांची लिंक मिळू शकेल त्याशिवाय ही लिंक परराष्ट्र व्यवहार मंत्रालयाच्या संकेतस्थळावर आणि विविध भारतीय दूतावासांच्या संकेतस्थळांवरही उपलब्ध असेल.सात तारखेपासून दररोज www.cinemasofindia.com  या संकेतस्थळावरुन हे चित्रपट मोफत दाखवले जातील.