मुंबई – चित्रपटसृष्टीतील एव्हरग्रीन अभिनेता म्हणून ओळखले जाणारे देवानंद हे कायमच कोणत्या ना कोणत्या कारणासाठी चर्चेत असतात. त्यांच्या व्यक्तिगत आयुष्यातील अनेक गोष्टींची नेहमी चर्चा होते. यातीलच एक किस्सा सुरैया हिचा. नुकतीच देवानंद यांची नववी पुण्यतिथी झाली. त्यानिमित्ताने त्यांच्या चाहत्यांसाठी ही एक आठवण.
अभिनेत्री सुरैय्यावर त्यांचे असलेले प्रेम, आणि त्याचा अत्यंत वाईटरित्या झालेला अंत हे कोणत्याही सिनेमापेक्षा कमी नाही. ‘विद्या’ चित्रपटाच्या सेटवर या दोघांची पहिली भेट झाली. सुरैया ही त्या काळातील सर्वाधिक मानधन घेणारी अभिनेत्री, तर देवानंद नवखे. सुरैय्याकडे अनेक गाड्या होत्या तर देवानंद शूटिंगसाठी सेटवर चालत यायचे. त्यांचा आत्मविश्वास सुरैय्याना खूप भावला होता.
आपल्या ‘romansing with life’ या पुस्तकात देवानंद यांनी या सगळ्याबाबत लिहिले आहे. ‘विद्या’ चित्रपटाच्या सेटवर देवानंद सुरैय्यासोबत फ्लर्ट करत असत. या दोघांमध्ये जवळीक वाढू लागली. पण सुरैय्याच्या आजीला हे नाते मान्य नव्हते. ती सुरैय्यासोबत कायमच हजर असे. पण एक दिवस काही कारणामुळे आजीला घरी जावे लागले. हीच संधी साधून देवानंद सुरैय्याच्या मेकअप रूममध्ये घुसले. जवळपास पाऊण तास ते दोघे गप्पा मारत होते. देवानंद यांनी तिला लग्नाची मागणी घातली आणि एक अंगठी देखील तिला दिली. पण, सुरैय्याच्या आजीला हे जेंव्हा कळलं, तेंव्हा ती भयंकर चिडली. आणि तिने ही अंगठी समुद्रात फेकून दिली. आणि या प्रेमकहाणीचा दुर्दैवी अंत झाला.
