देवळाली कॅम्प – गेल्या काही वर्षापासून शहराला पाणीपुरवठा करतांना प्रशासनाला सुमारे ५५ कोटी रुपयांचा तोटा सहन करावा लागत असतांना या खर्च भरून निघणे कामी प्रशासनाने सुचवलेली दरवाढीला विरोध करत अखेर प्रती हजार लिटरमागे ७० पैश्याची दरवाढ करण्याचा निर्णयावर सहमती देण्यासोबत शहरात सर्वच व्यावसायिक व नागरी इमारतींना सीसीटीव्ही, नागरिकांच्या सुरक्षेकामी आवश्यक अग्निशमन यंत्रणा, रखडलेला अतिक्रमण व भूमिगत गटाराच्या कामाबाबचे प्रश्न हॉस्पिटल सुविधा आदी मुख्य व गरजेच्या विषयांसह ३१ बांधकाम आराखड्यांना मंजूरी देण्याबरोबर विविध जनहिताच्या कामे करण्याचा निर्णय घेण्यासाठी देवळाली कॅन्टोन्मेंट बोर्डाच्या अखेरच्या बैठकीत चर्चा करण्यात येऊन ठराव करण्यात आले.
गुरुद्वारा रोडवरील कॅन्टोन्मेंट प्राथमिक शाळेच्या सभागृहात पदसिद्ध अध्यक्ष ब्रिगेडियर जे.एस.गोराया यांच्या अध्यक्षतेखाली ही अखेरची बैठक खेळीमेळीच्या वातावरणात संपन्न झाली. या बैठकीस उपाध्यक्ष सचिन ठाकरे, नगरसेवक प्रभावती धिवरे,भगवान कटारिया, कावेरी कासार, बाबुराव मोजाड, मीना करंजकर, ब्रिगेडियर शक्ती वर्धन, कर्नल अतुल बिस्ट,कर्नल पुनीत संघेरा, ग्रुप कॅप्टन जे.मॅथ्यू ,मुख्य कार्यकारी अधिकारी अजय कुमार, उपमुख्य कार्यकारी अधिकारी संजय सोनवणे आदी उपस्थित होते.
यावेळी बैठकीत शहरातील सर्वच व्यावसायिक संकुलांमध्ये पोलिस आयुक्तांकडून प्राप्त झालेल्या पत्रानुसार सीसीटीव्ही आवश्यक करण्यात आले. शहरात मागील काही दिवसांपासून विनापरवाना व्यवसाय करणाऱ्या मटण व चिकन व्यासायिकांना आकारण्यात आलेला दंड कमी करणे, बहुप्रतीक्षित डायलेसिस युनिट कार्यान्वित करणे, शहरात शासन निर्णयानुसार वॉर्ड ५ मधील स्टेशनवाडी व वॉर्ड ७ मधील शिगवे बहुला येथे अंगणवाडी सुरु करणे, भगूर येथील रेल्वेलगत असलेल्या अतिक्रमणाबाबत जिल्हाधिकारी यांना पत्र देऊन कारवाई करणे, भूमिगत गटार योजनेअंतर्गत आठही वॉर्डात प्रॉपर्टी चेंबर निर्माण करून गटार जोडणी करणे, कॅन्टोन्मेंट हॉस्पिटलमधील सर्व कंत्राटी डॉक्टर यांना एक वर्षासाठी मुदतवाढ देणे व शहराच्या सुरक्षेसाठी आवश्यक असणारी फायर सेफ्टी यंत्रणा शाळा,लॉन्स,खाजगी हॉस्पिटल, व्यावसायिक संकुले, कोचिंग क्लासेस, नर्सिंग होम व खाजगी ओपीडी सेंटर यांना बंधनकारक करण्यात आली. याकामी आवश्यक असणाऱ्या सर्व परवाणग्या शासन नियंत्रित फी भरून कॅन्टोन्मेंट देणार असल्याचे निर्णय घेण्यात आले.
प्रशासकीय कामकाज प्रशासकीय अधिकारी उमेश गोरवाडकर, सहाय्यक अभियंता विलास पाटील, स्वप्नील शोत्रीय, राजिंदर ठाकूर, प्रभाकर दोंदे, रवींद्र नेरे आदींनी पाहिले. सभेच्या शेवटी प्रशासनाच्या वतीने ब्रिगेडियर जे.एस गोराया यांच्या हस्ते सर्व लोकनियुक्त व लष्कर नियुक्त सदस्यांचा शाल श्रीफळ देऊन सत्कार करण्यात आला.
