देवळाली कॅम्प – येथील धुर्जड मळा परिसरात महानुभाव पंथीय भाविकांच्या वतीने येथील श्रीकृष्ण मंदिर गीताश्रमात गीताजयंती महोत्सव व पंचावतार उपहार सोहळा अत्यंत साधेपणाने साजरा करण्यात आला. कोविड १९ विषाणू फैलावाच्या दृष्टीने मोठ्या उत्साहात साजरा केला जाणारा हा सोहळा यावर्षी अत्यंत मोजक्या भाविकांच्या उपस्थितीत साजरा करण्यात आला. यावेळी मंदिरात सकाळी स्थानिक महंतांच्या उपस्थितीत भगवान श्रीकृष्ण मूर्तीस महाअभिषेक, परमपूज्य परम महंत मालेराज बाबाजी लासूरकर यांच्या हस्ते ध्वजारोहण करण्यात आले. गीतापारायण करण्यात येऊन गीताश्रमाचे प्रमुख महंत प.पु.दादेराज बाबा बिडकर यांसह उपस्थित महंत मंडळींच्या हस्ते पंचायतन देवतेस उपहार दाखविण्यात आला. याप्रसंगी श्रीधर धुर्जड, काशिनाथ धुर्जड, रमेश धुर्जड,विलास धुर्जड, सोमनाथ खातळे, गिरीश धुर्जड, दिनेश शिंदोडे,सतीश धुर्जड,प्रभाकर धुर्जड आदी उपस्थित होते.
