नवी दिल्ली – देशाची राजधानी दिल्लीत गेल्या काही दिवसांत झपाट्याने वाढत असलेल्या कोरोना प्रादुर्भावामुळे राज्य सरकारने लॉकडाऊन जाहीर करण्याची तयारी केली आहे. कोरोनाचे धोक्याचे केंद्र बनू शकतील अशा गर्दी असलेल्या बाजारपेठांमध्ये लॉकडाऊन लावण्यास राज्य सरकारने केंद्र सरकारकडे परवानगी मागितली आहे.
मुख्यमंत्री अरविंद केजरीवाल यांनी मंगळवारी याबाबत माध्यमांना सांगितले की, दिवाळी दरम्यान काही बाजारपेठेत प्रचंड गर्दी झाली होती. या बाजारपेठेत लोक मास्क परिधान करीत नाहीत किंवा सामाजिक अंतर देखील पाळले जात नव्हते. यामुळे, कोरोना वेगाने पसरला. अशा परिस्थितीत दिल्ली सरकारने एक प्रस्ताव तयार केला असून तो केंद्र सरकारकडे पाठविला आहे. वास्तविक, केंद्र सरकारने गेल्या वेळी आपल्या मार्गदर्शक सूचनांमध्ये म्हटले होते की, कोणत्याही राज्य सरकारला स्थानिक स्तरावर लॉकडाउन लादण्यासाठी केंद्राची परवानगी घ्यावी लागेल.
दिवाळी संपल्यानंतर बाजारपेठ कमी होईल आणि स्थानिक पातळीवर लॉकडाउन लादण्याची गरज भासणार नाही अशी मुख्यमंत्र्यांनी आशा व्यक्त केली आहे. तथापि, गरज पडल्यास सरकार शटडाउन पर्यायाचा प्रयत्न करेल. यासाठी बाजारात सामाजिक अंतर आणि मास्क परिधान करण्याच्या दिशानिर्देशांचे पालन केले जात आहे की नाही ? तसेच ते क्षेत्र कोरोना हॉटस्पॉट बनत आहे का हे पाहिले जाईल.
याबाबत कोठेही शिथिलता आढळल्यास खबरदारी म्हणून तो बाजार काही दिवस बंद ठेवला जाऊ शकतो. याबाबत मुख्यमंत्री पुढे म्हणाले की, केंद्र सरकारची परवानगी मिळताच कोरोनावर मात करण्यासाठी हा पर्याय लागू केला जाईल. त्याचप्रमाणे 200 ऐवजी केवळ 50 लोकांना लग्नात भाग घेता येईल. त्याचा प्रस्ताव उपराज्यपालांना मान्यतेसाठी पाठविण्यात आला आहे. काही आठवड्यांपूर्वी दिल्लीत कोरोनाची प्रकृती सुधारली असताना केंद्र सरकारने दिलेल्या निर्देशानुसार राज्य सरकारने लग्नात भाग घेणाऱ्याची संख्या 50 वरून 200 केली. परंतु कोरोनाची वाढती प्रकरणे लक्षात घेता हा आदेश मागे घेण्याचा निर्णय घेण्यात आला आहे.
