– पोलिसांनी वेळीच धाव घेत सदर महिला सरपंचाचा जीव वाचवला
दिंडोरी : तालुक्यातील सरपंच उपसरपंच निवडणुकीला गालबोट लागले असून महाजे येथे सरपंच पदाच्या महिला उमेदवारांवर जीवघेणा हल्ला झाल्याची घटना घडली आहे. पोलिसांनी वेळीच धाव घेत सदर महिला सरपंचाचा जीव वाचवत पुढील अनर्थ टळला. मात्र विरोधी गटाच्या दगडफेकीत सहाय्यक पोलीस निरीक्षकांसह पाच पोलीस व काही ग्रामस्थ जखमी झाले आहे. दरम्यान कडक पोलीस बंदोबस्तात निवडणूक प्रक्रिया पार पडत सरपंच पदी रुपाली सोमनाथ भोये तर उपसरपंचपदी कविता ज्ञानेश्वर इंगळे यांची निवड झाली आहे.
याबाबत मिळालेली माहिती अशी की, दिंडोरी तालुक्यातील महाजे ग्रुप ग्रामपंचायत सरपंच उपसरपंच निवडणुकीसाठी.तहसीलदार पंकज पवार यांचे उपस्थितीत निवडणूक निर्णय अधिकारी भोये यांचे अध्यक्षतेखाली निवडणूक प्रक्रिया पार पडली .महाजे येथील ग्रुप ग्रामपंचायत अंतर्गत सादराळे व शृंगारपाडा येथील सदस्यांचे बहुमत असल्याने येथील सरपंच उपसरपंच निवड होण्याची शक्यता होती. त्यास महाजे येथील सदस्य व काही ग्रामस्थांचा विरोध होता. येथे वाद होण्याची कुणकुण पोलीस प्रशासनाला लागल्याने येथे वाढीव पोलीस बंदोबस्त ठेवण्यात आला होता. सादराळे व शृंगारपाडा येथील सदस्य निवडणूक प्रक्रियेस आले असता त्यांना अडवत प्रक्रियेसाठी जाण्यापासून रोखण्यासाठी महिला मोठ्या प्रमाणात जमा होत्या. त्यांनी सदर सदस्यांना अडविण्याचा प्रयत्न केला. काही ग्रामस्थांनी दगडफेक केली. मात्र पोलिसांनी वेळीच हस्तक्षेप करत सदस्यांना ग्रामपंचायत कार्यालयात जाऊ दिले. मात्र या गोंधळात काही महिलांनी सरपंच पदाच्या उमेदवार रुपाली सोमनाथ भोये यांना रोखत त्यांचेवर हल्ला केला. साडीने गळा अवळण्याचा प्रकार झाला. एक वृद्ध महिलेलाही मारहाण झाली. सहाय्यक पोलीस निरीक्षक कलपेशकुमार चव्हाण,हवालदार पजई ,युवराज खांडवी आदी पोलिसांनी धाव घेत सदर महिलेची सुखरूप सुटका केली. यावेळी सहाय्यक पोलीस निरीक्षक कलपेशकुमार चव्हाण,युवराज खांडवी,पजई यांचेसह पाच पोलीस जखमी झाले. पोलिसांनी जमावाला आटोक्यात आणत अतिरिक्त पोलीस बंदोबस्त बोलवत निवडणूक प्रक्रिया विहित वेळेत पार पडली.पोलिसांनी काही संशयित आरोपींना ताब्यात घेतले असून गावात मोठा बंदोबस्त तैनात करण्यात आला असून गावात तणावपूर्ण शांतता आहे.पोलीस निरीक्षक अनिलकुमार बोरसे यांचे मार्गदर्शनाखाली अधिक तपास सुरू आहे.
Follow India Darpan
ताज्या बातम्या आणि चर्चांसाठी आमच्या सोशल मीडियावर जोडा!
ग्रामीण ते शहरी आणि जुन्या ते नव्या अशा सर्वच पातळीवर आम्ही विकास पत्रकारितेला अधिक महत्त्व देतो. समाजोन्नती व्हावी, लोकशाही बळकट व्हावी, अन्यायाला वाचा फोडावी आणि विधायक कार्य घडावे यासाठी आम्ही आग्रही आहोत.
