मुंबई ः शिवसेना पक्ष प्रमुख आणि मुख्यमंत्री उद्धव ठाकरे यांचे लहान पुत्र तेजस ठाकरे यांच्या दोन सुरक्षा रक्षकांना कोरोनाची बाधा झाल्याचे समोर आले आहे. तेजस यांच्या अन्य सुरक्षा रक्षकांचीही त्वरीत कोरोना चाचणी करण्यात आली आहे. वांद्रे येथील कलानगरमध्ये ठाकरे यांचे मातोश्री निवासस्थान आहे. याठिकाणी गेटवर असलेल्या तीन पोलिसांना यापूर्वी कोरोनाची लागण झाली होती. त्यानंतर आता तेजस यांच्या सुरक्षा रक्षकांना कोरोना बाधा झाली आहे. तेजस यांना वाय प्लस सुरक्षा आहे. त्यांच्या अन्य सुरक्षा रक्षकांना तातडीने क्वारंटाईन करण्यात आल्याचे सांगण्यात येत आहे.
