नवी दिल्ली – जगाच्या इतिहासात अनेक श्रीमंत राजांचा उल्लेख असून त्यांच्याकडे संपत्तीचा खूप मोठा साठा होता. त्यापैकी काही राजांच्या संपत्तीचा तर अंदाज करणे फार कठीण होते. यात टिम्बकटू देशाचा राजा मनसा मुसा जगातील सर्वाधिक श्रीमंत राजा मानला जात असून आजवर त्याची संपत्ती नेमकी किती होती हे कळले नाही.
सध्या, टिम्बकटू हे आफ्रिकेतील माली या देशामधील एक शहर असून पूर्वी येथे प्रचंड सोन्याचे साठे होते. त्यावेळी माली देशावर मनसा मुसा याचे राज्य होते. या राजाच्या कारकिर्दीत सुमारे एक हजार किलो सोन्याचे उत्पादन झाले, असे म्हणतात. वास्तविक, मनसा मूसा याचे खरे नाव मुसा कीता (प्रथम ) होते. पण राजा झाल्यानंतर त्याला मनसा म्हटले गेले.
मानसा म्हणजे राजा. मूसा सुलतान हा इतका श्रीमंत होता की, त्याचा आपल्याला अंदाज येऊ शकत नव्हता. आजच्या काळातील मॉरिटानिया, सेनेगल, गॅम्बिया, गिनी, बुर्किना फासो, माली, नायजर, चाड आणि नायजेरिया ही त्याकाळी मुसाच्या राज्याचा भाग होते.
