नवी दिल्ली – कृषी सुधार कायद्याबाबत उद्या (४ जानेवारी) प्रस्तावित चर्चेपूर्वी शेतकरी संघटनांनी पुन्हा एकदा केंद्र सरकारवर दबाव आणण्यासाठी मोर्चा काढण्याचा निर्णय घेतला आहे. संयुक्त किसान मोर्चाने जाहीर केले की, त्यांच्या मागण्या मान्य न झाल्यास ते १३ जानेवारी रोजी मकरसंक्रांतीला देशभरात कृषी कायद्याची होळी जाळतील. तसेच २६ जानेवारी रोजी दिल्लीत ट्रॅक्टरसह स्वतंत्र ‘किसान गणराज्य परेड’ तथा मोर्चा काढण्यात येईल.
पत्रकार परिषदेत शेतकरी नेत्यांनी सांगितले की, या मोर्चाचे ठिकाण अद्याप ठरलेले नाही. तथापि, यातून राजपथच्या प्रजासत्ताक दिनाच्या परेडमध्ये अडथळा आणण्याचा कोणताही प्रयत्न केला जाणार नाही. ४ जानेवारी रोजी चर्चेला अपयशी ठरल्यास ट्रॅक्टर मोर्चाद्वारे एक्सप्रेस वेवर निदर्शने करण्यात येतील. शाहजहांपूरवर मोर्चा काढणारे शेतकरी दिल्लीकडे कूच करतील. त्याचबरोबर ६ ते २० जानेवारी दरम्यान केंद्र सरकारविरूद्ध ‘जागृती पंधरवडा’ साजरा केला जाईल. २३ जानेवारी रोजी राज्यभरातील राज्यपालांच्या निवासस्थानाबाहेर शेतकरी समर्थक आंदोलन केले जाईल.
