नाशिक – महाराष्ट्र राज्य तंत्रशिक्षण संचालनायलयातर्फे डिप्लोमा इंजीनिअरिंगसाठी चौथ्यांदा मुदतवाढ देण्यात आली आहे. २१ सप्टेंबर पर्यंत तिसरी मुदतवाढ दिली असतांना २४ हजार जागांसाठी अपेक्षित अर्ज प्राप्त न झाल्यामुळे संचालनायलयातर्फे मुदतवाढ देण्यात आली आहे. त्यामुळे डिप्लोमा अभ्यासक्रमासाठी अर्ज करू इच्छिणाऱ्या विद्यार्थ्यांना आता ३० सप्टेंबर पर्यंत अर्ज भरता येणार आहे.
डिप्लोमा इंजिनिअरिंगला प्रवेश घेणाऱ्या विद्यार्थ्यांचा कल दिवसेंदिवस कमी होत असल्याचे चित्र दिसून येत आहे. याच धरणीवर तंत्रशिक्षण संचालनालयातर्फे रिक्त जागांसाठी मुदतवाढ देण्यात आली आहे. अर्ज केल्यावर लगेचच मूळ कागदपत्रांची पडताळणी होणार आहे. त्यानंतर ३० सप्टेंबरला संध्याकाळी ५ वाजता तात्पुरता गुणवत्ता यादी जाहीर केली जाणार आहे. प्रवेशअर्जा संदर्भात आक्षेप असल्यास विद्यार्थी ४ ते ६ ऑक्टोबर दरम्यान तक्रार नोंदवू शकतात. यानंतर ८ ऑक्टोबरला पहिली यादी जाहीर केली जाणार आहे. नाशिक विभागात एकूण २४ हजार जागा रिक्त असतांना तंत्रशिक्षण मंडळाने मुदतवाढीचा निर्णय घेतला आहे. www.dtemaharashtra.gov.in या वेबसाईटवर अधिक माहिती उपलब्ध आहे.
