नाशिक – शहरातील कोरोना बाधितांची संख्या १६ हजारांपुढे गेली आहे. कोरोनाचा वाढता प्रादुर्भाव लक्षात घेता महापालिकेने आता आरोग्य सुविधा वाढविण्याचे काम सुरु केले आहे. याचाच एक भाग म्हणून एबीबी सर्कल जवळील ठक्कर डोम आणि सिडकोतील संभाजी स्टेडिअम येथे कोविड सेंटर कार्यन्वित केले जाणार आहे. या दोन्ही ठिकाणांची पाहणी महापालिका आयुक्त कैलास जाधव यांनी शनिवारी केली.
संभाजी स्टेडियम व ठक्कर डोम येथे कोरोना कक्ष कार्यान्वित करण्याच्या दृष्टीने आयुक्तांनी अधिकाऱ्यांसमवेत पाहणी करून त्या ठिकाणी विविध प्रकारच्या कामाच्या सूचना संबंधित विभागांना दिल्या. नाशिक महानगरपालिका क्षेत्रात कोरोना रुग्णांची संख्या दिवसेंदिवस वाढत आहे. या पार्श्वभूमीवर शहरातील रुग्णांना बेडची संख्या अपुरी पडू नये या दृष्टीने मनपाच्या वतीने युद्धपातळीवर कामकाज सुरू आहे. त्यामध्ये कोरोना कक्षाच्या संख्येत वाढ करून त्यात बेडची संख्या वाढवण्याच्या दृष्टीने उपाययोजना केल्या जात आहेत.
या पार्श्वभूमीवर नवीन नाशिक संभाजी स्टेडियमच्या जागेत सुमारे २०० रुग्णांची व्यवस्था होईल, असे नियोजन करून या कामास गती देऊन तातडीने पूर्ण करण्याच्या सूचना आयुक्तांनी यावेळी दिल्या. तसेच ठक्कर डोम येथील कोरोना कक्ष त्वरित सुरू होईल, या दृष्टीने पाहणी करून क्रेडाईचे पदाधिकारी सचिन बागड, रवी महाजन, कुणाल पाटील व अनिल आहेर यांच्याशी आयुक्तांनी चर्चा केली. यावेळी उपायुक्त मनोज घोडे-पाटील, सहाय्यक संचालक नगर रचना अंकुश सोनकांबळे, अधीक्षक अभियंता संदीप नलावडे, कार्यकारी अभियंता एस.एम.चव्हाणके, कार्यकारी अभियंता राजू आहेर, घनकचरा व्यवस्थापन संचालिका कल्पना कुटे, विभागीय अधिकारी मयूर पाटील व आदी अधिकारी उपस्थित होते.