नाशिक – जिल्हा परिषद आरोग्य विभाग मार्फत माझे कुटुंब माझी जबाबदारी या मोहिमेचे जिल्हास्तरीय उद्घाटन जिल्हा परिषदेचे अध्यक्ष बाळासाहेब शिरसागर व जिल्हा परिषदेच्या मुख्य कार्यकारी अधिकारी श्रीमती लीना बनसोड यांच्या हस्ते झाले. या कार्यक्रमात पोस्टर प्रदर्शित करण्यात आले. याप्रसंगी आरोग्य सभापती सुरेखा नरेंद्र दराडे, कृषी विभागाचे सभापती संजय बनकर जिल्हा परिषद सदस्यसिद्धार्थ वनारसे, दीपक शिरसाट तसेच जिल्हा आरोग्य अधिकारी डॉ. कपिल आहेर, अतिरिक्त जिल्हा आरोग्य अधिकारी डॉ. दावल साळवे उपस्थित होते.
याप्रसंगी या मोहिमेची माहिती देण्यात आली. जिल्ह्यामध्ये माझे कुटुंब माझी जबाबदारी या मोहिमेची जनजागृती समाजात चांगल्या प्रकारे व्हावी व काय काळजी घ्यावी याविषयी अत्यंत मार्मिक शब्दांमध्ये हे या पोस्टरमध्ये माहिती देण्यात आल्याचेही सांगण्यात आले. मोहिम काळामध्ये हे पोस्टर विविध ठिकाणी प्रदर्शित करण्यात येणार आहेत. नाशिक जिल्ह्यातील प्रत्येक घरी आरोग्य कर्मचाऱ्या मार्फत भेट देण्यात येणार असून प्रत्येक कुटुंबाची माहिती ती ॲप मध्ये भरली जाणार आहे. तसेच कोमाँरबिड व सारीच्या संशयित रुग्णांची तपासणी करण्यात येणार आहे. घरातील प्रत्येक व्यक्तीचे तपमान व आजारी वृद्ध व्यक्तींचे रक्तातील ऑक्सिजनचे प्रमाण तपासण्यात येणार असून ताप किंवा कोरोना सदृश्य लक्षणे असलेल्या पेशंटला वैद्यकीय अधिकारी यांच्यामार्फत तपासून संदर्भ सेवा देण्यात येणार आहे. हा कार्यक्रम १५ सप्टेंबर ते २४ ऑक्टोबर या कालावधीमध्ये दोन टप्प्यांमध्ये राबवल्या जाणार आहे. कोरोना साथ आटोक्यात आणण्यासाठी वरील प्रतिबंधात्मक उपाय योजना शासनाने केली आहे. या मोहिमेअंतर्गत महिला बालकल्याण विभाग ग्रामपंचायत विभाग आरोग्य विभाग अत्यंत सूक्ष्म रीतीने नियोजन करून काम करीत आहेत. या मोहिमेवर तालुका आरोग्य अधिकारी गटविकास अधिकारी कार्यालय मार्फत नियंत्रित केले जात आहे. जिल्हा स्तरावरील आरोग्य पर्यवेक्षक व अधिकारी यांचेमार्फत संनियंत्रण केले जाणार आहे. अत्यंत चांगल्या प्रकारे कार्यक्रम राबवावा व जिल्ह्यात कोरोनाची रुग्णसंख्या आटोक्यात राहून मृत्यूदर कमी व्हावा यासाठी आरोग्य विभाग प्रयत्नशील आहे. या कार्यक्रमासाठी लोकप्रतिनिधी गाव पातळीवरील मान्यवर यांचा अत्यंत चांगल्या प्रकारे सहकार्य असणारा आहे. नागरिकांनी आपल्या घरी येणाऱ्या सर्वेक्षण करणाऱ्या आरोग्य कर्मचारी व आरोग्य दूतांना योग्य प्रकारे माहिती देण्यात येऊन सहकार्य करावे असे आवाहन यावेळी करण्यात आले.
