नाशिक – शहरातील ज्येष्ठ तबला वादक आणि पेठे शाळेचे माजी शिक्षक नवीन तांबट (७०) यांचे निधन झाले. काही दिवसांपूर्वीच त्यांना कोरोनाची लागण झाली होती. त्यामुळे ते उपचारार्थ कोविड सेंटरमध्ये दाखल होते. तेथे त्यांची प्रकृती आणखी खालावल्याने त्यांना खासगी हॉस्पिटलमधील अतिदक्षता विभागात हलविण्यात आले. आज सकाळई ८ वाजता त्यांचे निधन झाले.
अनेक दिग्गज कलाकारांसोबत त्यांनी तबल्याची साथसंगत केली होती. त्यात प्रसिद्ध संगितकार श्रीनिवास खळे, अनिल मोहिले आदींचा समावेश आहे. तसेच, असंख्य विद्यार्थ्यांना त्यांनी घडविले. त्यांच्या पश्चात पत्नी, मुलगा, सून, मुलगी, पुतणे असा परिवार आहे. त्यांच्या निधनामुळे सर्व स्तरातून त्यांना श्रद्धांजली वाहण्यात येत आहे.
शांत, संयमी आणि हसतमुख, विद्यार्थीप्रिय शिक्षक म्हणून त्यांची ख्याती होती. विद्यार्थ्यांशी मैत्रीपूर्ण नाते जोडून त्यांच्यात अभ्यासाविषयी रूची ते निर्माण करत. त्यामुळेच अनेक उपक्रमांमध्ये विद्यार्थ्यांना सहभागी करून घेण्याचे कौशल्य तांबट यांच्याकडे होते.
