ज्येष्ठ अभिनेत्री आशालता वाबगावकर यांचे निधन
सातारा – ज्येष्ठ अभिनेत्री आशालता वाबगावकर यांचे निधन झाले आहे. साताऱ्यातील प्रतिभा हॉस्पिटल येथे त्यांनी अखेरचा श्वास घेतला. कोरोनाची लागण झाल्यामुळे गेले चार दिवस त्यांच्यावर उपचार सुरू होते. ‘आई माझी काळूबाई’ या सिरियलचे शुटिंग सुरू असताना त्यांना लागण झाली होती. आशालता वाबगावकर यांच्याव्यतिरिक्त सेटवरील इतर २७ जणांना कोरोनाची लागण झाली आहे.
गेल्या महिन्याभरापासून सुरू असलेल्या ‘माझी आई काळुबाई’ या मालिकेच्या सेटवर कोरोनाने शिरकाव केला असून सेटवरच्या तब्बल २७ जणांना कोरोनाची लागण झाली आहे. शिवाय, या मालिकेतील महत्वाच्या भूमिकेत असणाऱ्या ज्येष्ठ अभिनेत्री आशालता वाबगावकर यांनाही लागण झाली होती. त्यांची प्रकृती चिंताजनक होती. गेले चार दिवस आशालता वाबगावकर यांच्यावर साताऱ्यात उपचार सुरू होते. अखेर आज पहाटे त्यांची प्राणज्योत मालवली. जवळपास ४० हून अधिक वर्ष रंगभूमी, सिनेमा आणि मालिकांमधून त्या काम करत होत्या. तसेच नाट्यसंगीतामधूनही त्यांनी वेगळी ओळख निर्माण केली होती. त्या मूळच्या गोव्याच्या असून, त्यांनी कोकणी आणि मराठी चित्रपटांच्या माध्यमातून अभिनयाला सुरुवात केली. मराठी आणि हिंदी भाषेत सुमारे १०० हून अधिक चित्रपटांमधून काम केले आहे. गुंतता हृदय हे, रायगडाला जेव्हा जाग येते, चिन्ना आणि महानंदा यामध्ये त्यांनी प्रमुख भूमिका साकारल्या होत्या. संगीत नाटक मत्स्यगंधाच्या माध्यमातून त्यांनी नाटकातील कारर्कीदीस सुरुवात केली. तर बासू चटर्जी यांच्या ‘अपने पराये’या चित्रपटाच्या माध्यमातून त्यांनी हिंदी चित्रपटसृष्टीत पदार्पण केले. याच चित्रपटातील अभिनयासाठी त्यांना सहाय्यक अभिनेत्रीसाठी फिल्म फेअर या सोहळ्यात नामांकन मिळाले होते. मराठी चित्रपट सृष्टीत उंबरठा, सूत्रधार, नवरी मिळे नवऱ्याला, वहिनीची माया, माहेरची साडी हे त्यांचे गाजलेले चित्रपट होते.
